मिरु सोरखारा मिरु बर' थुनलाइ आफाद सुंद'यै बि एस एसा दैखांनाय मैखोम दाबिफोरखौ गनायथि होबाय। गोबां राव गोनां सोदोबबिहुं (Multilingual Dictionary) जों लोगोसे मोनब्रै मावथांखि (Projects) खौ गनायना लाबाय।
मिरु बर' थुनलाइ आफादनि सासे बिबानारि (Office Bearer) या फोरमायहरनाय बादिब्ला गोबां रावगोनां सोदोबबिहुं (Multilingual Dictionary) आ गाहायै बर', हिन्दी, बेंगलि आरो इंराजि रावाव फोसावनाय जागोन। आरोबाव बिथाङा दाजाबदेरनानै बुंबावो दि गुबुन मोनथाम मावथांखि (Projects) खौ बर' थुनलाइ आफादा जौगाखां महर होगोन। बेफोरनि गेजेराव फारियै मेथाइ आरो सावगारि महर होनाय (Music and Fine Art's), बिजाब बाख्रिनि बिगियान आयदा ( Library Science) आरो बर' रावाव न'खर बिगियान (Home Science) ।
मिरु बर' थुनलाइ आफाद नि लेङाइ आफादगिरि कमला कान्त मोसाहारि बिथाङा मिरु हिन्दी बिगियान आरो बिरोंदामिन सोदोबमाला कमिसन बिफान (Central Hindi Directorate and Commission for Scientific and technological Terminology ) नि मासिगिरि आफानिस कुमारखौ लोगो हमहैना जोंनि आफादा थिखांनाया गोनांथार आयदानि सायाव सावरायनाय जादों होन्ना बुंथियो। सावराय जानायनि उनाव बर' थुनलाइ आफादनि थान्दैखौ मिरु हिन्दी बिगियान आरो बिरोंदामिन सोदोबमाला गौथुमा दिखांनाय मोनब्रै दाबिखौ गनायना लादों।
दासिमाव मिरु बर' थुनलाइ आफादा आसामनि नसुङारि राज्यो सोनाब बंग नि कशबिहार, जलपाइगुरि आरो दार्जिलिं जिल्लानि सिङाव थानाय मैखोम बर' सुबुं थानाय जायगायाव थाखो थाम ( Class III ) फैगो सोलोंथाइ बोसोरनि फ्राय जागाय जेननाय जागोन होनना मिथिहोदों। सोनाब बंग सोरखार जोंबो जोंनि रायज्लायनाया सोलिगासिनो दं। मिरु बर' थुनलाइ आफाद नि बिबाननारि (Office Bearer) या फोरमाय हरनाय बादिब्ला सोनाब बंग आव गं 50 फरायसालियाव बर' राव फोरोंथाइ मिरु (Boro Language Teaching Centres) जागायजेनसिगोन। मख'जाथावदि आसामनि नसुङारि राज्यो सोनाब बंग आव खमैबो 2.5 लाख बर' सुबुं अन्जिमा (Boro Population) दं। मिरु बर' थुनलाइ आफाद नि बान्जाय नायाव फैगौ डिसेम्बर दानाव गोबां रावगोनां सोदोबबिहुं (Multilingual Dictionary) खामानिनि सायाव मावबादा खुंफुं जागोन होनना मिथिहोयो।