गुवाहाटी नोगोरमानि लामायाव सानफ्रोमबो नुहरबाय थानाय ट्रफिक जेंनाखौ खमायलांनाय थांखियै गोदान रिजिअनेल ट्रेन्सपर्ट अथ'रिथि (RTA) नि बाहागो महरै ट्रफिक बिफाना माखासे राहा लादों। बेनि थांखि बादियै नोगोरमायाव सोलिबाय थानाय बासफोराव दायो टाइम कार्ड हरग्रोनाय जागोन। नैबे टाइम कार्डनि जोहै बासफोरा सालायनो हागोन। सानफ्रोमबो बे कार्डखौ गारि खारहैनायनि सिगांनो हरनाय जागोन। टाइम कार्डनि बादिब्ला गंसे बासा गुबुन बासखौ बारनानै (Overtake) दावखोलांनो हानाय नङा।
बे गासिबो आयदायाव गारि सालायग्रा आरो राज्यो राजाखौ मिथिहोनाय थांखियै खानापारायाव हान्था मेला बिफान आरो ट्रफिक नि जुथायै बान्जायनायाव सांग्रांथियारि हाबाफारि लानाय जायो।
गुवाहाटी नोगोरमायाव अजायै गं 669 सिटि बास दं आरो बेनि बदलै मोन 550 लामा। आसाम हान्था मेला निगमनि बेंखनाव गं 200 दंखायो। गुबुन फारसेथिं उला, उबेर नि बेंखनाव दं गं 10,000 गारि,अट'रिक्सानि अन्जिमा 5,000 आरो गं 1650 गारि मेट्र टेक्सि। ओंखायनो गुवाहाटीआव अजायै 1.05 लाख गारि दं।
मख'जाथावदि आगोलनि समाव गुवाहाटी नि सिङाव थानाय बासफोरा थिखानाय सम बादियैनो सोलिदोंमोन। नाथाय दासिमाव गावसोरनि गोसोबादियैनो सालायनायखौ नुनो मोननाय जादों। जाय थाखाय जेराव मेराव गारिखौ थाबथानानै हान्थियारिनि थांलाय फैलाय लामायाव जेंना सोमजियो। थिखानाय गारि लाखिग्रा जायगायाव (Bus Stoppage) लाखिनाय नि सोलायै जान्ला मान्ला जायगानिफ्राय हान्थियारिखौ गाखोलांनायाव ट्रफिक जेंना जेंसिनि आबहावावा बांनायनि फ्राय बांगासिनो दं।जेराव हान्था मेलानि मोनबो नेम खान्थि गैयिनि महर मोनदों।
गुवाहाटी नोगोरमानि सानफ्रोमबो नुबाय थानाय सुबुं थाबायलांनाय फुटफाट फोराव गला फज'नाय आरो जेराव मेराव गारिखौ लाखिनानै ट्रेफिक जेंनाखौ बारायदों। मख'जाथावदि गुवाहाटी हान्था मेलानि दारै आजावजानो गोनां "टाइम कार्ड " नि राहाया बे जेंनानिफ्राइ राज्यो-राजाजों लोगोसे गारि सालायगिरिखौ रैखाथि होगोन होनना मिजिंथिनाय जादों।
Also Read: अदालगुरियाव एबसुनि बारग’ नेहाथारि रिन्जय बर’आ बिजेपि दोलोआव हाबहैबाय
Also Watch: Central Karam Sanmilan begins in Tinsukia | The Sentinel News | Assam News