Guwahati : गुवाहाटी गोजौ बिजिरसालिया गुवाहाटी नोगोरमानि सिंआव आरो बायजोआव थानाय दीप , दैबबारिखौ साखोन सिखोन आबहावा सोरजिनायाव गोनांथार राहा आजावनो दै सिबस्रांनाय बिबानाव थानाय बिफान (Body) खौ बिथोन हरदों। बेफोर गोनांथार जायगाफोरनि गेजेराव दिधली पुखुरि, जुरपुखुरि आरो दिपर बिल। बे गासैबो थावनिखौ साखोन सिखोन महरै लाखिनो नांगौ।
गुवाहाटी नोगोरमा खोला सोनाब बाहागोनि सानतिपुर हालामाव थानाय दिपरबील दैब'बारिया गोगो दैनि थिलि। आसाम सोरखारा 1989 माइथायाव दिपरबील दैब'बारिखौ इल्दलाइफ सेनसुरि महरै अर'नारि दावसिन दावलाखौ होबथानायनि थांखिजों गायसन्लांदोंमोन। आसामनि गंसे गोनांथार दावबायारि मुहिनांथाव थिलि। दिपर बिलआ इल्दलाइफ सेनसुरिआ गुवाहाटी इल्दलाइफ सेनसुरि एरियानि सिङाव दं, जायनि दब्लाइथिया 4.10 बर्ग किल'मिटार। गुवाहाटी गोजौ बिजिरसालिया आसामनि हाग्रामा संरैखाथि बिफाननि गाहाइ बिबानगोरा (Principal Chief Conservator of Forests ) खौ गासैबो जाहोनखौ नायबिजिरनानै एफिदिफिद 15 नबेम्बराव गथायनो गोख्रों बिथोन हरदोंमोन। मख'जाथावदि दीपर बिल हाग्रामा बिफाननि सिङाव। दासिम हालागै मोनबो रोखोमनि खामानि आवगायलांङाखै। जों बै खामानिखौ मावफुंलांनो थाखाय थोजासे सम होनाय जागोन उनाव रिपर्टखौ गथायनाय नांगोन होन्ना बिजिरसालिया बुंथिदों। आसामनि हाग्रामा संरैखाथि बिफाननि गाहाइ बिबानगोरानि जानानै 18 जुलाइआव बिजिरसालिखौ ओनसोलनि सोमखोर मिथिंगायारि आबहावाखौ नोजोर लाखिनानै मोनसे अरायजोर राहा लामा आजावनो खावलाय हरदोंमोन। रायखांनो गोनां दि आसामनि गिबि मन्थ्रि (Chief Minister) सर्बानन्द सन'वाल बिथांआ दिपर बिल संरैखाथि आरो जौगाखां अनसाइ आफाद (Conservation and Development) नि मासिगिरि (Chairman) नि मासियाव जिरायनानै दं।
मख'जाथावदि दिधली पुखुरि मानसि जावखांनायनि गेजेरजों सोरजिनाय से माइल खावसेनिबो बारा गोलावनि मोनसे जारिमिनारि फुख्रि।जारिमिनारि समाव बे फुख्रिखौ आहम खुंथाया बाहायदोंमोन। बे लेकखौ मोनसे समाव बुरलुंबुथुर दैमाजों फोनांजाबनाय जादोंमोन। उनाव बेखौ बन्द खालामनाय जादोंमोन। आथिखालाव बै जायगायावनो सार्किट हाउस लुफुंनाय जादों।
आसाम सोरखारनि दावबाय बिफान (Tourism Department) नि नायदिंनायनि सिंआव दिधली पुखुरिआ दं। गोजौ बिजिरसालिनि बेन्सनि बिजिरगिरि मोना दावबाय बिफानखौ अरायथा राहा लामा दिहुन्नानै साखोन सिखोन महरै लाखिनो थिनहरनाय जादों। सा-सानजा हादोरसानि दरखं मोखांखौ सोमखोर मिथिंगायारि आबहावा गायसंलांनायाव जर'खा बिफाव लानायाव बिहोमा होलांनो सुबुरुन होदों।
उजानबाजाराव थानाय जुरपुखुरिया गुवाहाटी मिउनिसिपालटि कर्परेसन ( Guwahati Municipality Corporation) नि नायगिदिंनायनि नोजोराव दैदेनजायो। बेनि रांखान्थियारि बिथिंनि खरसाखौ एमरुट मिशना सामलायलांङो।
