Guwahati : बि जे पि सोरखारा खुंथाइ गोहोआव थानाय समाव राज्योआव सासेबो गुबुनारिया जायगा दखल खालामनो हाया आरो से इन्सि हा खोन्दोखौ आवग्रिनो हानाय नङा। गोदान बोसोरनि गिबि खौरां मेलनि खुंफुंनायनि गेजेरजों आसाम प्रदेश भारतीय जनता पार्ति सुंद'यै बि जे पि नि आफादगिरि रन्जित कुमार दास बिथाङा बुङो दि आसामाव 42 लाख मददगिरि (Supporter) मोना थांनानै थानायाव सासेबो गुबुनारिया जायगा आवग्रिनो गोहो गैया। आगोलनि कंग्रेस दोलोनि दैदेननाय हादोरसा सोरखारा थागिबि सुबुं माहारिनि हानि मोनथाय (Land Rights) नि थाखाय मावाखैसै। बेनि सोलायै बिसोरो दैमानि बोरियाव थानाय सुबुंफोरखौ हा पाट्टा रान्नानै हरबाय। हादोरसानि सिङाव थानाय गोबां बोसोरनिफ्राय आलो गोजोनै जिउ खांनाय थागिबि सुबुं माहारि बर', मिसिं, सन'वाल नि थाखाय जेबो मावनो हायाखै होन्ना सोंखारियो। बि जे पि आ जा खामानि मावलांदों गासैबो राज्यो-राजानि गाहाम सान्नानै मोनबो खहा जायालासे मावदों। कंग्रेस आरो लेफ्ट पार्टिया नोगोरारि सोदांफिन्नाय आइननि हेंथायै नंखाय लामाजों फोसावनानै राज्यो-राजाखौ नंखाय लामाजों आनदायहोदों। मोनसे समनि सुथुर जारिमिनारि आसाम सोमावसारनायाव मुंख्लं जालांनाय सुबुंनि दायनिगिरिया दासान्दि मददगिरिनि महराव नुजादों। कंग्रेस दोलोआ गंफ्रोमबो मुंख्लंनि नख'राव थांनानै निमाहा बिहरथों होन्ना सोखारियो।
नोगोरारि सोदांफिन्नाय आइननि असिला लानानै सोरबाया गोदान राजखान्थि दोलो जोनोम होयोब्ला बि जे पि दोलोनि खहा खालामगोन होन्ना सोंनायनि फिन्नायाव जों बेसेबां मासियाव देरहासात जायो बेखौ नाथाय 100 नि बारा मासि (seat) याव देरहासात जागोन बेयो रोखा थार। सोरखारा गोदान लेण्ड प'लिसि लाबोनायनि गेजेरजों थागिबि सुबुं माहारिखौ हानि मोनथाय होगोन। जोंनि सोरखारा बोसोर बोसोरनिफ्राय जिउ खांनाय राज्यो-राजानि गांनाय उखैनायखौ सुफुंनायाव मावनां बिबान दंखायो। बेनि थाखाय सोरबाया बेरेखा खालामनानै खुद्रिसारनाय दिन्थिफुंङो बेखौ जों आगानसे खेरखेराया होन्ना बुंथिहरो। आसामाव आयेन बेरेखा हाबसनफैग्रा गुबुनारिखौ लाबोनायनि दायाव कंग्रेस दोलोआ हारसिंनो दायनिगिरि। मख'जाथावदि रुंसारि गाहाइ मन्थ्रि राजिब गान्धीनि माव बिबान समाव आसाम गोरोबथानि काट अफ यारखौ 1951 नि सोलायै 1971 माइथाय गनायथि होनायनि थाखाय लाखनि बारा बांलादेशी नोगोरारिया भारतारि नोगोरारिनि मानदान्दा गनायथि मोन्दोंमोन।
गुबुन फारसेथिं जाय आयेन बेरेखायै हाबसनफैग्रा गुबुनारिखौ होख्रांजोबनायनि सायाव गावनि बिबुंथियाव आसाम प्रदेश भारतीय जनता पार्ति नि (Assam BJP President) आफादगिरि रन्जित कुमार दास बिथाङा बुङो दि बे आयदाया गोथौ एबा जेथो गोनां मानोना बेयो हादोर गेजेरारि आयदा। बेनि थाखाय गोबां समनि गोनांथि दं होन्ना फोरमायो।
