Guwahati : आसामनि दाब दाब जायगायाव थानाय केन्द्रीय बिद्यालय (KVs) आव फरायनाय फरायसाफोरनि बिमा बिफा एबा दिथागिरिफोरखौ अस'मिया रावनि (Assamese Language) आयदा महरै आजावनो थांनायाव गोबां जिंगा सिनाय नुनो मोननाय जादों।
बे गासिबो आयदानि सायाव केन्द्रीय बिद्यालय (KVs) आव फरायनाय फरायसाफोरनि बिमा बिफा एबा दिथागिरिफोरा ज' जानानै केन्द्रीय बिद्यालय अभिभाबक सन्था मुंनि मोनसे गौथुम (Association) दाफुंदों। बे गौथुमनि बिबानगिरिमोनजों लोगोसे गुबुन गुबुना मोननै आयदा फरायसा इयुननि फारसे नोजोर लाखिनानै दैखांदों, केन्द्रीय बिद्यालय (KVs) नि फरा-फारियाव (Curriculum) अस'मिया आयदाखौ सोदेरफानाय आरो गुबुन मोनसेया गोलोम बोथोरनि मे जुन दानाव बन्ध खुंफुं जाबोनायनि सोलायै जुलाइ आगष्ट दानाव फसंलांनांगौ।
दासिम हालागै दाफुंजानाय आफादनि बिबानगिरिमोना दैखांनाय दाबि दावाफोरखौ दावखोलांनायनि थांखियै आसामनिफ्राय सायख' जानाय माखासे सांसद (Parliamentarian) फोरखौ गोसोखां लाइ गथायदों। दासिमाव बिसोरो आयदाखौ दैखांनाय सांसदफोरनि गेजेराव दं फारियै गुवाहाटी संसदारि बियाबनि बि जे पि सांसद (Parliamentarian) कुइन उजा, मंगलदै संसदारि बियाब (HPC) नि बि जे पि सांसद दिलिप सइकीया, तेजपुरनि भारतीय जनता पार्ति नि (BJP) सांसद पल्लब लचन दास आरो सानै भारतीय जातीय कंग्रेस दोलो (Indian National Congress) नि कलियाबर ल'क सभा बियाबनि एम पि गौरब गगै आरो नगाव ल'क सभा संसदारि बियाबनि एम पि प्रद्युद बरदलै बिथांमोनखौ के भि आव अस'मिया रावनि आयदाखौ सिगांलांनो एबा मोगथाङाव जाफुंसार जानो थाखाय बेनि थाखाय गोख्रों आगान सुरलांनो खावलायदों सुबुंथान्दै (Public Representative) मोनखौ।
रायखांनो गोनां दि बिमा बिफा आरो दिथागिरिखौ अस'मिया आयदाखौ सोदेरफानायाव गिलिर बिबान लानानै आवगायनायखौ नुनो मोननाय जादों। बे थांखियै हादोरनि गाहाइ मन्थ्रि नरेन्द्र मडि दैदेननाय सोरखारनि सोद्रोमा अदेबानि मिरु सुबुं फुंखा बिफान (Union Human Resources Minister) नि मन्थ्रिखौ मोननै दाबिखौ इ मेइल आरो पष्टनि गेजेरजों दैथायहरनाय जादों। बेरा फारसेथिं जाय कामरुप मेट्रपलिटान जिलानि बेंगिरि (Deputy Commissioner) बिश्वजित पेगु बिथांखौ गांसे गोसोखां लाइ गथायनाय जादों लोगोसे पेगु बिथांआ खानापारायाव थानाय केन्द्रीय बिद्यालय (KVs) नि सामलाय आफादनि मासिगिरि (Chairman) ।
रायखांनो गोनां दि गुवाहाटी ल'क सभा संसदारि बियाब (HPC) नि बि जे पि नि एम पि (Parliamentarian) कुइन उजा बिथाङा गोजां बोथोरनि संसदनि जथुम्मायाव मिरु सुबुं फुंखा बिफाननि मन्थ्रिखौ अस'मिया आयदाखौ केन्द्रीय बिद्यालय (KVs) फोराव सोफादेरनो दाबि दैखांदों जाहाथे आसामनि गुबुन गुबुन जिल्लायाव थानाय बे सोलोंथाय फसंथानाव फरायनाय फरायसाफोरा गावनि असे बिमा रावखौ आवथेनो एबा सोलोंनो हायो। ओनसोलारि राव (Regional Language) महरै अस'मिया रावखौ मिरु गेजेर सोलोंथाय गौथुम (CBSE) नि फरा फारियाव सोदेरनाया गाहाम होन्ना गुबुन गुबुन दोलो गौथुम नि बादि राज्यो राजाया बुंथिदों।
Also Read :कक्राझार सोहोराव एस टि बिलनि हेंथायै सि सि टि अ ए आ बन्जार हान्जा सुरदों
Also Watch: AGP leadership has not been vocal against the CAB: Prafulla Kumar Mahanta