Guwahati : आसामनि बारग' गिबि मन्थ्रि प्रफुल्ल कुमार महन्त बिथाङा बृहस्पतिबार खालि थाखोमानानै सिथारनाय दायाव आंखौ गुवाहाटी गोजौ बिजिरसालि (Gauhati High Court) या क्लीन सिट होदोंमोन होनना फोरमायदों। मख'जाथावदि आसाम प्रदेश भारतीय जनता पार्ति सुंद'यै बि जे पि (Assam State BJP) नि बान्जायनायाव बरपेटा जिल्लानि सिङाव थानाय सर'भगाव मोनसे गोजोन हान्जा सुरगिदिंनाय हाबाफारि (Peace Rally) याव बाहागो लानानै बुंथियो दि आसामनि देहा सावस्रि बिफाननि (State Health & Finance Minister) मन्थ्रि ड° हिमन्त बिश्व शर्मा बिथाङा प्रफुल्ल कुमार महन्त बिथाङा थाखोमानानै सिथारनाय दायाव (Secret Killings) लोब्बा दं होनना अ'जद दैखांदोंमोन। बै बिबुंथिनि सानसे उनावनो महन्त बिथाङा गावनि फिनहोनाय बिबुंथियाव बुङो दि आंखौ खास्रि बिस्रियै बुथारनायनि बुलि जानाय सुबुंफोरनि दायाव बिजिरसालिया क्लीन सिट होदों। बै समाव आसामाव ए जि पि नि सोरखारा मिरु सोरखारनि खाथियाव आर'ज गाबहरदोंमोन होन्ना बृहस्पतिबार खालि खुंफुंजानाय मोनसे खौरांगिरि मेलनि गेजेरजों रोखा खालामो। बुंनो हायोदि दासान्दि राजखान्थिनि फोथाराव प्रफुल्ल कुमार महन्त बिथाङा बि जे पि दोलोनि दैदेनगिरि मोननि मेगननि नोजोराव गोग्लैदों।
रायखांनो गोनां दि फैगो 2021 माइथायाव गासै 126 बिधान सभा बियाब (LACs) नि 100 मासि देरहासात जानानै फिन खुंथाइनि गोहोआव जिरायगोन होन्ना दाबि खालामनायखौ मख'लांनानै प्रफुल्ल कुमार महन्त बिथाङा बुङो दि बि जे पि दोलोआ नोगोरारि सोदांफिन्नाय आइनखौ राजखान्थियारि मुलामफा आर्जिनायनि थांखियै लाबोनाय जादों। दुलाराय आसाम फरायसा आफादनिफ्राय होखारहर जानानै कंग्रेस दोलोआव हाबजेन्दोंमोन आरो दासान्दि हिमन्त बिश्वआ बि जे पि खौबो थगायगोन होन्ना फोरमायो। बायदि बायदि रां जाख्ल'नाय गेना दायजों लेथेर फेथेर नांजानाय दैदेनगिरिया रैखा मोननो थाखाय बि जे पि आव हाबजेन्दोंमोन होन्नानै अ'जद दैखाङो।
2014 माइथायाव बै समनि भारतीय जनता पार्ति सुंद'यै बि जे पि नि लेङाइ आफादगिरि एस एस आह्लुवालिया बिथाङा बुंदोंमोन दि दिल्लियाव सोरखार दाफुंनाय लोगो-लोगोनो हिमन्तनि हेंथायै थानाय बायदि गेना खामानिनि केसफोरखौ नायबिजिरसंनाय जागोन। बै हुमखिखौ गिखांनानै दानि मन्थ्रि हिमन्त बिश्व शर्मा बिथाङा थाबथाबैनो बि जे पि आव हाबफैयो आरो दासान्दि बै दोलोआनो रेड कार्पेट बनानै बरायबाय।
मख'जाथावदि बुधबार खालि गोजोन हान्जा सुरनाय हाबाफारियाव बाहागो लानानै आसामनि रांखान्थि मन्थ्रि ड° हिमन्त बिश्व शर्मा बिथाङा बुंथिनाय खोथाखौ फिन्नाय होनानै महन्त बिथाङा बुङो बै समनि मिरु सोरखारा आइन सोदांफिन्नानैबो आयेन बेरेखा गुबुनारि सुबुंनि गथ' ग'थायखौ नोगोरारिनि गनायथि होनाय आयदायाव बेरेखा खालामदोंमोन बै समनि आसामनि खुंथाइ गोहोआव जिरायनाय असम गण परिषद दोलोनि सोरखारा होन्ना फोरमायो।
Also Read:फैगो बिधान सभानि बिसायख’थियाव आसामनि राज्यो-राजाया बि जे पि खौ गाहाम फिन्नाय होगोन: आसु
Also Watch: All Assam Lawyers Association staged a protest rally against CAA 2019 in Guwahati