Guwahati : गुवाहाटी गोजौ बिजिरसालिखौ नोगोरमानि राजालामायाव अरायबो नुजाबाय थानाय मथर गारिनि थाबथानाय एबा ट्रफिक जेंनायाव गोनांथि आगान लानायखौ नुनो मोननाय जादों। रायखांनो गोनां दि गुवाहाटी नोगोरमानि मालिगाव ओनसोलनि थागिरि रिता दास मजुमदार बिथाङा बे जेंनाखौ नोजोर लाखिनानै पि आइ एल बिजिरसालियाव आर'ज गाबहरदोंमोन। बे पि आइ एल बिलायाव नोगोरमानि अख्रां आबहावा गुबुंनायखौ लानानै जिंगासिनाय खोथाखौ आर'ज लाइनि सिङाव मख'नाय जादों।
गुवाहाटी गोजौ बिजिरसालिनि मानिनां गाहाइ बिजिरगिरि गेदेमा अजय लाम्बा आरो बिजिरगिरि असिन्त मल्ल बुजरबरुवा नि दैदेननायाव बेन्स हान्जाया कामरुप मेट्रपलिटान जिला खुंथाइ बिफान, पुलिस आरो गुबुन गुबुन बिफानखौ मोनसे थिखानाय समसिमानि गेजेराव नोगोरारि जौगाखांनायाव नांथाब नाजानानै मालफुंलांनो खावलायदों। बै बिथोनलायाव खामानिखौ बिगियानारि आदब खान्थिजों आजावनानै बोस्रांलांनायाव गोनांथि होनो खावलायदों।
गुवाहाटी नोगोरमानि ट्रफिक पुलिसनि बिबानगोराखौ गारि मथर लाखिग्रा पार्किंनि जायगा मोजांङै सिनायथिनो बिथोन होदों। गारि मथर लाखिग्रा गुवार लांदां जायगा नायगासिनो दं जेराव हान्थियारि , गुबुन गुबुन गारि सालायनाय हेंथा सोमजिया। पुलिसनि बिबानगोरा मोना नागिरदों जे मोनबो थांलाय फैलाय लामायाव जेंना सोमजिया।
मख'जाथावदि आसाम पुलिसा जर'खा बिफाव आजावनानै हान्थियारिखौ थुलुंगाखांनाय थांखियै मोननै फेसबुक एकाउन्ट खुलिदों जेराव राज्यो-राजाया आइन बेरेखायै गारि मथर लाखिग्रा सुबुंनि हेंथायै फट', भिडिअग्राफी दिखांनानै दैथायहरनो हागोन। ट्रफिक पुलिसनि बिबानगोराया दायनां सुलाद मोन्नाय लोगो लोगोनो अ'जदनि बिथायाव जर'खा राहा आजावनाय जागोन होन्ना फोरमायदों।
बेल' नङा आरोबाव हान्थियारि सुबुंफोरखौ थुलुंगाखांनाय थांखि नानै मोननै हवाट्स आप ग्रुप बांद्रायै फोसावनो खुलिनाय जागोन। बास गारि , गोनांथार सुबुं थुबर जानाय जायगायाव हवाट्स आप थानाय पष्टार सिथाबनाय जागोन जेराव गावखौनो गाव सांग्रांथि जानो हागोन। लोगोसे गुवाहाटी एफ एम (रेडिअ') फोसाव बिजोंनि गेजेरजों राज्यो-राजाखौ सांग्रांथि लाबोनायनि थांखि।
मख'जाथावदि गुवाहाटी नोगोरमानि राज्यो-राजाखौ बुंनाय जादों जेराव ट्रेफिक जेंनानि मुगा मुगि बुब्लियाव नुजायो अब्लानो खोन्थाहरनि बिथायाव ट्रेफिकनि बिबानगोराया नुजागोन आरो लोगोसे गोनांथार खोथाया बेनोदि सोरबा पुलिस अफिसारा गावनि दिउतियाव थानानैबो ट्रेफिक जेंना सोलिबाय थानाय समाव सामलायना होआ अब्ला बेनि थाखाय जर'खा बिफाव आजावनाय जागोन।
राज्योनि पुलिस गाहाइ सामलायगिरिनि सुबुरुनाव नखर बिफाननि नेहाथारि (Home Secretary) डि आइ जि मानथाखोनि सिंनि बिबानगोरा खौ बे खामानियाव नांथाब होनाय जागोन। जेराव बिथांआ फेसबुक आरो हवाट्स आप एकाउन्टनि गेजेरजों सोरबा सुबुङा खान्थि बेरेखा आखु एबा खामानि मावलांदों नामा , बेनि सायाव नोजोर लाखिनानै साफ्रोमबो नोगोरारिनि गाहाम सान्नानै गोनांथार राहा लाग्रोनायनि आबुं गोहो गथायनाय जागोन होन्ना गुवाहाटी गोजौ बिजिरसालिया फोरमायदों।
हान्था मेला सामलाय बिफाना मोनसे थिखानाय लाखिग्रा जायगायावसो थाबथानो हागोन आरो नेम खान्थिखौ मानिनानै सोलिनो बिथोन होदों। रायखांनो गोनां दि नोगोरमानि सानफ्रोमबो नुहरबाय थानाय राजालामा नि ट्रेफिक जेंनाखौ बोस्रांलांनो आरो नोगोरारिया थांलाय फैलाय लामायाव जाहाथे जेंना सोमजिनाय नङा , बेनि थाखाय गोनांथार जायगायाव सि सि टि भि केमेरा फसंनाय जागोन होन्ना पुलिस बिफाना फोरमायदों ।
