Guwahati : नोगोरारि सोदांनाय आइनखौ बेरेखा खालामनानै थांनाय सप्ताहयाव आसामनि सोरबिथिं दुंहाव एबा गुलुं गुजुं थासारिखौ नोजोर लाखिनानै गोलाव सान बारनायनि उनाव मैया अदेबानि सुक्रबार खालि फुंआवनो गुवाहाटीयाव खुंफुंनाय मोनसे खौरां मेलनि हादोरसानि गिबि मन्थ्रि सर्बानन्द सन'वाल बिथांआ "का " नि गेजेरजों माखासे दुथां आखल आखुनि सुबुंआ अस'मिया राव, हारिमु,थुनलाइ , समाजखौ फोजोबस्रांगोन होन्ना नंखाय बाखाय खोथाजों रोजा रोजा राज्यो-राजाखौ नंखाय लामाजों आनदायहोदों अ'जद दैखांङो। सन'वाल बिथांआ रोखायै फोरमायो दि अस'मिया अराय समनि थाखाय हादोरसायारि राव महरै थागोन। बेयाव सनदेह' खालामनो मोनबो जाहोन थानाङा होनना फोरमायो।
मख'जाथावदि नोगोरारि सोदांनाय आइनखौ खेंसालियायै मदद खालामनायजों गावनि बिबुंथियाव बुंथियो दि आसाम हादोरसाया सानफ्रोमबो थागिबि अस'मिया सुबुं माहारिनि जानानै थागोन। थागिबि अस'मिया सुबुं समाजनि मोनथाइ ,मान सन्मान , थामोनथा रावबो गादबनो , सेख'नो हाया। अस'मिया रावा जेब्लाबो अस'मियानि आखायावनो थागोन। बेनि थाखाय सोरखारा नांगौ जासे आगान एबा राहा लादों।
बेराफारसे थिं जाय आसामनि फारफ्रोमबो बिथिंनिफ्राय रोजा रोजा राज्यो-राजाया राव दोहोरोम सायख'वालासे गासैबो थाखोनि राज्यो-राजाया बेले बेजे गोनां नोगोरारि सोदांनाय आइनखौ बेरेखा खालामनानै सोमावसारनायखौ नेवसिनानै गिबि मन्थ्रि सर्बानन्द सन'वाल बिथांआ बुंथियो दि गोदान महरनि नोगोरारि सोदांनाय आइननि गेजेरजों सासेबो बिदेशी हाबफैया। बेनि गेजेरजों जायफोरा बोसोर बोसोरनिफ्राय दोहोरोमारि सानस्रिजों हालाय हाफाय थासारिजों भुगिनांनाय दुखुथिया सुबुंफोरखौ नौनारिनि गनायथि होनाय जागोन।
मख'जाथावदि माखासे सुबुंआ नोगोरारि सोदांनाय आइननि गेजेरजों सोरबाया से कौटि खावसे सुबुंआ हाबसनफैगोन नंखाय फोसावदों। नाथाय आं सासे थागिबि फिसा महरै बयखौबो रोखा रोखायै बुंदोंदि आसाम अराय सम अस'मिया समाजनि आखायावनो थागोन। राव हारिमु दोहोरोम थुनलाइ , समाजखान्थिखौ रैखाथि आरो थामोन्था बासायनायाव जोंनि सोरखारनि मावनां गुदि बिबान दं होन्ना फोरमायो। नोगोरारि आइनखौ लानानै सुबुंदारारि खान्थिजों सोमावसारनाय हाबाफारिखौ जों गोसो गोर्बोजों सिबियो। नाथाय गोजोन सोमावसारनायखौ अहिंसा लामानि असिला लानानै माखासे दुथां आखल आखुनि सुबुंआ दुंहाव थासारि सोमजिहोदों। जेराव जोंनि एम एल ए , मिरु मन्थ्रि रामेश्वर टेलि, सोरखारि मावख', पन्सायत थान्दैखौ हुमखि होदों, फसंथानाव अर जोंब्लावहोदों। बै गासैबो अहिंसा जाथायखौ गाहामै गाहाम नायबिजिरनो थाखाय दासान्दियाव सोरखारा एस आइ टि जाफुंनाय जादों। नायबिजिरनाय फिथायाव दायनिगिरि हमजानाय सासेबो सुबुंखौ रेहाय होनाय जाया होन्ना फोरमायो।
