इस पि डब्लिउ एस आफादगिरि दिलिप नुनिसाया आलादा डिमाराजि दाफुंनांगौनि दाबि दैखांबाय
Haflong: हालालि वेलफेयार प्रग्रेसिफ ससाइटि आफादा कार्बि आंलं जिलानि थागिबि कारबि सुबुंनि राजखान्थियारि मोनथाय रैखाथि होनांगौनि थांखिजों आलादा हादोरसा बिहरनायनि दाबियाव गोख्रों मावथांखि लानायखौ नुनो मोननाय जादों। बे थांखियै हालालि वेलफेयार प्रग्रेसिफ ससाइटिनि आफादगिरि दिलिप निनिसा बिथांआ बुंथियो दि भारत हादोरनि गेजेरावनो गंसे आलादा राज्यो डिमाराजि दाफुंना होनांगौनि दाबि दैखांङो। लोगोसे बारग' डिमा आर्मि आरो सिफिल केडारफोरखौ लानानै बुधबार खालि तुलारामराजियाव मोनसे मेल मिथिं खुंफुंलाङो। मख'जाथावदि हालालि वेलफेयार प्रग्रेसिफ ससाइटिखौ डिमा हालाम दावगा आफाद महरै मिथिनाय जादोंमोन।
मख'जाथावदि आफादनि गुबुन गुबुन दैदेनगिरि मावथि फोरजों जानाय सावरायनायनि उनाव आगोलनि हालालि वेलफेयार प्रग्रेसिफ ससाइटि आफादखौ महरै दाफुंनाय जायो आरो फिन बारग' उदखारि हान्जा डिमा हालाम दावगानि बारग' आफादगिरि, दैदेनगिरि दिलिप नुनिसाखौ गोबां मावथि सोद्रोमा मोननि मदद होहरनायाव आफादगिरि महरै सायखनाय जायो।
गोलाव बोसोरनिफ्राय भुगिनानै थानांनाय डिमा हालामनि थागिबि सुबुं माहारिनि रांखान्थियारि नासयनाय, राजखान्थियारि मोनथाय रैखाथि होनांगौनि थांखिजों दिन्दां जानानै थानाय आलादा हादोरसा (Separate Dimaraji State) बिहरनाय दाबिखौ भारत हादोरनि गेजेरावनो दाबि दैखांङो। बेजों लोगोसे दफा नं 2.8 नि बिथायाव बर्मन हजाइ जौगाखां गौथुम (Development Council) दाफुंना होनाय, औवानि पार्क बोखारनाय (Bamboo Park) आरो गुवाहाटी नोगोरमायाव थानाय स्रिमन्त संकरदेब कलाक्षेत्र आरो सिल्पग्रामनि बादि दोनथुमसालि जारिमिनारि थावनि माइबंआव लुफुंना होनांगौनि आर'ज गाबहरो।
आसामनि थागिबि भारतारि डिमासा सुबुं माहारि (Indigenous Ethnic Dimasa Community) नि गोलाव बोसोरनिफ्राय दाबिनानै फैनाय आलादा डिमाराजि हादोरसानि जेंनाखौ सुफुंनो आरो गांनाय उखैनायखौ मोन्दांनानै गोजोन थासारि आरो खौसेथि सोमजिनायनि थांखिजों बुजिलायनि गरन्थ (Memorandum of Settlement) खौ थाबैनो मावफुंनो थाखाय बि जे पि दैदेननाय मिरु आरो हादोरसा सोरखारखौ गोख्रों दाबि दैखाङो।
खौरांगिरिजों जानाय मुगा मुगि बुब्लियाव डिमा हालाम दावगा आफादनि आफादगिरि दिलिप नुनिसा बिथाङा बुङो दि गोलाव बोसोरनिफ्राय दाबि खालामनाय बुजिलायनि गरन्थ (Memorandum of Settlement) खौ थाबैनो मावफुंनो हायैआ थारैनो दुखुनांथाव बाथ्रा।
बे गोनांथार आयदानि सायाव मिरु न'खर बिफाननि मन्थ्रि अमित चाह बिथांजों थाबैनो बुजिलायनि गरन्थ (Memorandum of Settlement) नि सायाव हान्जासे थान्दै मोना लोगो हमहैगोन आरो आलादा राज्यो डिमाराजि दाफुंना होनायजों लोगोसे गुबुन गुबुन आयदानि सायाव जोंनि सुबुंदारारि खान्थिजों सोमावसारनाया गोख्रोंयै सोलिबाय थागोन होनना मोनथियो ।
