Guwahati : हादोरसायाव गोख्रैथिजों आधार कार्डनि खामानि सोलिबोबाय थानाय समावनो जिंगासिगोनां खौरांआ सोरांआव फैदों। हादोरसानि दाब दाब जायगाफोराव थिसन्नाय आधार कार्डनि मुं थिसन्नाय मिरुफोरा थांनाय सेप्टेमबर दाननिफ्राय खामानि मावालासे अदेबानि बन्ध' जानानै दं। जायनि जाहोनाव गोबां राज्यो-राजाया आधार कार्डनि खामानि मावालासे न' मोखांफार्से थांफिन्नो गोनां जादों।
बेबादि हादोरसानि सिङाव थानाय गुबुन गुबुन आधार मुं थिसन्नाय खामानिया माखासे जिल्लायाव जोबोद लासैनो दावखोलांनायाव हादोरसा सोरखारनि साधारन खुंथाइ बिफान (General Administration Department) नि रेजिस्ट्रार बिथाङा आधार कार्डनि खामानि गोख्रैथियै मावलांनो थाखाय गं 6 फसंथान (Firms) खौ रानदिंना होदों। मख'जाथावदि बे थिरांथाखौ बुधबार खालि जनता भबनाव जानाय गंसे जथुमाव लानाय जायो ।
रायखांनो गोनां दि राव , धोरोम आरो बैसो सायख'वालासे जायखिजाया नंगुबै भारतारि नोगोरारिया आधार कार्डआव उदांयै गावनि मुं थिसन्नो हागोन। गोसो गुदुं आर'ज गाबगिरि नोगोरारिखौ मिनिमेल देम'ग्राफिक आरो बायमेट्रिकनि खारिथि बेसेन नांङालासे जगायनाय जागोन।
दि सेन्टिनेल खौरांलाइजों जानाय मुगा मुगि बुब्लियाव हादोरसा सोरखारनि साधारन खुंथाइ बिफान (GAD) नि कमिसोनार एम अंगमुथु बुङो दि हादोरसानि गं 11 जिलायाव जोबोद लासैनो दावखोलांनायखौ नुनो मोनदों। बेफोरनि गेजेराव दं फारियै बिश्वनाथ, बङाइगाव, कासार, डिब्रुगर, हाइलाकान्दि, करिमगन्ज, कामरुम मेट्र,कामरुप, नलबारि , सिबसागर आरो तिनसुकिया।
लोगोसे आरोबाव बिथाङा दाजाबदेरनानै बुंबावो दि "Messrs Balaji Construction Limited आरो Messrs Pariza Enterprises" फसंथान मोननैखौ लासै एबा लेहेम खामानि मावलांनायनि थाखाय हुमखि होदों। बै फसंथानखौ सोलिफु दाननि गेजेरावनो गासैबो आधार कार्डनि सोमोन्दो गोनां खामानिफोरखौ दावखोलांनो बिथोन हरनाय जादों। जुदि बै फसंथान मोननैया हादोरसा सोरखारा थिखाना होनाय बिथोनलाइफोरखौ थि सम सिमानि गेजेराव फोजोबलांनो हायाब्ला नांगौथार आयेनारि राहा लानाय जागोन होन्ना फोरमायदों एम अंगमुथु बिथाङा।
थांनाय 2018 बोसोरनि गेजेर बाहागोआव आसाम सोरखारनि साधारन खुंथाइ बिफान (General Administration Department) आ आधार कार्डनि खामानि जागायजेनदोंमोन। तेन्दार थिसन्नायनि उनाव गं 6 फसंथानखौ खामानि मावफुंलांनो थिनहरनाय जादों। हादोरसा सोरखारा दाब दाब जायगानि सोरखारि मावख'आवनो गं 1,241 आधार एनरल्मेन्ट मिरु गायसंलांदोंमोन।
जायखि जादोला मानो हादोरसायाव आधार एनरल्मेन्ट खामानिया बन्ध' खालामना लाखिदोंमोन जेब्ला सोलिफु बोसोरनि 15 फेब्रुवारियाव हादोरारि नोगोरारि फारिलाइ (National Registration of Citizenship) नि दाबि आरो अ'जद दैखांनायनि हेयारिं जागायजेन्दोंमोन। हादोरनि जौसिन बिजिरसालिनि बिथोन हरनायाव आसामनि न'खर आरो राजखान्थि बिफाननि जोहै जायफोरा एन आर सि नि हेयारिंनि उनाव अ'जद दैखांनाय आरो दाबिनायनि सायाव बायमेट्रिक खारिथि (Data) बुथुमबावदोंमोन होन्ना मोनथिनो मोननाय जादों।
Also Read: सा- सान्जायारि बिजाब मेला फोरबो: गासै ₹ 4 कौटि रांनि बिजाबफोर फाननो हानायनि फोरमायथि
Also Watch: Guwahati Mahanagari Unayan Samiti gheraoes Guwahati Jal Board Office