गुवाहाटिः आसाम हदोरसाया निखावरिथि नुनायखौ थादनाय गैया लासे जाफुंहोनाय खामानिजों आरो माहात्मा गान्धि नेस्यनेल रुरेल इमप्लयमेन्ट गुरान्टि एक्ट (MGNREGA) स्किमनि गेजेरजों मोनसे सोलायनाय महराव लाबोगोननि थांखि। जाय खौ नायोब्ला सिगां समफोरनिफ्राय हमनानै 1,61,258 मावनो गोनां खामनिफोरा दासिम मावफुंनो हायै गोग्लैसोना दं एबा मावनाया आद्रा जाना दं होनना फोरमायदों।
पानच्यात आरो रुरेल देबेलपमेन्ट (P&RD) बिफाननि फोरमायनाय बादियैब्ला 24,634 खामनिफोरखौ जागायजेननायनिफ्रायनो 2019 माइथायनि 25 अक्टबर खालारसिम खरसा खालामनाय जायाखै। बेफोर गासैबो नंआ। थांनाय थाम बोसोराव 24,652 खामानिफोरनि थाखाय जौसेनि से खोन्दो खरसा खालामनाय जायाखै। 27,606 खामनिफोरखौ थांनाय नै बोसोर फोराव जौसेनि से खोन्दोबो खरसा खालामाखै, 44,405 खामानिफोरा थांनाय बोसोरफोरनि खामानिफोराव बाहायजायाखै।
खारिथि बुथुम ओंखारनायखौ नायोब्ला गोरिबद्राय हालोदाव गोग्लैनाय काचार जिल्लायाव 14,235 खामनिफोर मावनाय आद्रा जाना दं। बे बादिनो कारिमगन्ज आव 11,997, खामनिफोर मावनाय आद्रा जाना दं, कार्बिआंलंआव 8,925 खामनिफोर मावनो आद्रा जाना दं। बारबेटा जिल्लायाव 8,752 खामनिफोरा मावनो आद्रा जाना दं। धुबुरि जिल्लायाव 6,730 खामनिफोरा मावनो आद्रा जाना दं। गलाघाट जिल्लायाव 7,385 खामनिफोरा मावनो आद्रा जाना दं। कामरुपआव गासै 6,704 खामनिफोरा मावनो आद्रा जाना दं। उदालगुरि जिल्लायाव गासै 6,482 खामनिफोरा मावनो आद्रा जाना दं। आरो कक्राझार जिल्लायाव गासै 5,085 मावनो लानाय खामानिफोरा मावनो आद्रा जाना दं बेफोरखौ रोखायै मोन्थिनो मोननाय जादों।
गोनांथारै मिरु आरो हादोरसा सोरखारारि स्किम जेरै जि.एस .वाइ (GSY), प्रधान मन्त्रि आवाज यजना (PMAY) (ग्रामिन) फोरनि गेजेरजों मावफुनो लानाय बिथांखि खिग्रा न, बिफां फुलि गायनाय, फुख्रि जावनाय बायदि बायदि फोरा माहात्मा गान्धि नेस्यनेल रुरेल इमप्लयमेन्ट गुरान्टि एक्ट (MGNREGA) नि गेजेरजों मावफुंजागोन। आरो बेफोर बांसिनै रुरेल ओनसोलारि जौगाथायनि थाखाय मावफुंजागोन।
गाहायै जेसेबां मावनो लानाय स्किमफोर दं अदेबानि मावनो लानाय खामानिफोरा आद्रा थानायजों लोगोसे गासैबो खामानिआनो माहात्मा गान्धि नेस्यनेल रुरेल इमप्लयमेन्ट गुरान्टि एक्ट (MGNREGA) नि गेजेरजोंसो मावफुंजागोन एबा माहात्मा गान्धि नेस्यनेल रुरेल इमप्लयमेन्ट गुरान्टि एक्टनि (MGNREGA) गेजेरजों मावफुंनाय जागोन होनना मोन्थिनो मोननाय जादों।
