Kokrajhar : दिनै नेसनेल डेमक्राटिक फ्रन्ट अफ बर'लेण्ड सुंद'यै एन डि एफ बि नि गायसननाय सान। आलादा बर'लेण्ड हादोरसा दाफुंनायनि थांखि सिगां लाखिनानै दानि बि टि सि नि अदालगुरि जिलानि कासिबारियाव 1986 माइथायाव 3 अक्ट'बराव गायसंगिरि आफादगिरि रन्जन दैमारि उरफे डि आर नाब्लानि दैदेननायाव एन डि एफ बि नि जोनोम जादोंमोन। गाहायै बर' माहारिनि थामोन्थाखौ रैखा खालामनाय, गादबनाय, सेख'नाय, लांसुनिफ्राय उदां खालामनाय थाखायनो हाथियार दैग्रा उदखारि हान्जा।
भारत सोरखारनि न'खर बिफाना खोथा होनाय बादियै इं 2005 माइथायाव सावरायनायाव फैदोंमोन। दिनै बि टि ए डि नि दरथाम डेजिगनेटेड केम्प फारियै कक्राझारनि सेरफांगुरि,अदालगुरिनि साफेखाटि आरो बाक्सा जिलानि बर्बरियाव गा 33 थि एन डि एफ बि नि गायसननाय सान फालिनाय जायो। कक्राझारनि सेरफांगुरि डेजिगनेटेड केम्पाव गावसोरनि बिग्रायारि फिरफिलाखौ एन डि एफ बि (पि) नि गाहाइ नेहाथारि एस सानजारां। बेवहायनो बराय बिबुंथि लाखियो बिग्रायारि आफादनि जुदिसियेल नेहाथारि बि बेंगाया।
एन डि एफ बि (पि) नि आफादनि गाहाइ नेहाथारि एस सानजारां बिथाङा खौरांगिरिनि सिगाङाव फोरमायहरो दि हादोरनि गाहाइ मन्थ्रि नरेन्द्र मडि दैदेननाय एन डि ए सोरखारा एन डि एफ बि (पि) जों मोनसे दाजाबथाइ सावराय लायनाय सोलिगासिनो दं आरो थाबैनो बर'लेण्ड जेंनाखौ बोस्रांनानै जोंनि गांनाय उखैनायखौ सुफुंसारगोन।
दिनैनि बे गायसननाय सानाव मिजिंथिनानै बुंथियो दि थांनाय बिसायख'थियाव बि जे पि दोलोआ गावसोरनि मेनिफेस्टआव मख'नाय सिमान बादियैनो जेंनाया सुस्रांथों होनना बुङो। जेब्ला सिम बर'लेण्ड जेंनाया सुस्रां नाय नि लामायाव नुजाया अब्लासिम जोंनि सोमावसारनाया सोलिगोन होन्ना हुमखि होयो।
रायदावनो गोनांदि मिरुआव भारतीय जनता पार्ति सुंद'यै बि जे पि नि सोरखारा खुंथाइ गोहोआव गाखोनाय लोगो लोगोनो बर'लेण्ड जेंनाखौ सुस्रांनायनि सिमान होदोंमोन। नाथाय दुखुनांथावै मिरु आरो राज्योआव बि जे पि नि सोरखार थासेयावबो जेंनाया बोस्रांलांनायनि लामायाव नुजायाखै। आगोलनि कंग्रेस सोरखारनि आमोलाव गासै खेबजिब्रै सावराय जादोंमोन। नाथाय दानि बि जे पि आमोलाव खेबसेल' सावरायनाय जादों होन्ना दुखु जों फोरमायो।
