जाय समाव दुलाराय हादोरावनो अट'मबाइल दारिमिनाव बेजनेसा लोरबां फार्से दावखोनायनि खौरां ओंखारदों बै समावनो इं 2019 माइथायनि 31 आगष्टसिम दानफ्रोमाव फ्राय गं 45,000 गारि नि खारि थिसनजादों। मख'जाथावदि कामरुप मेट्रपलिटान जिलायावनो बे बोसोराव एप्रिल निफ्राय आगष्ट सिम मोनफ्रोमबो दानाव गं 9,000 गोदान गारि मुं थिसनजादोंमोन।
इं 2017-18 आरो 2018-19 माइथायनि थांनाय रांखान्थियारि बोसोराव राज्योआव गारिनि खारि थिसनथाइखौ डाबुल खालामनाय जादों। आसामनि हान्था-मेला बिफाननि कमिसनार मावख'निफ्राय मोननाय फुंखानि बादिब्ला , राज्योआव फिसकेल 2014-15 आव गं 2,67,900 मटर गारि रेजिस्थार खालामनाय जासिनदों। फिसकेल 2015-16 आव गं 2,90,874 आरो 2016-17 आव गं 2,92,980 गारिनि रेजिस्ट्रेन खालामनाय जादोंमोन। इं 2017-18 माइथायाव गोदान गारिनखौ लाफानानै मोन 4,42,747 मथर गारि मुं थिसनजादों मख'जाथावदि इं 2018-19 रांखान्थियारि बोसोरावबो जेबो थाबथानाय जायालासे राज्योआव गं 5,02,525 गारि मथरनि खारि थिसननाय जादों।
राज्योनि हान्था मेलानि बिफानारि इनपुटनि बादिब्ला , इं 2018-19 माइथायाव गरनै साखागोनां गारि मोन 2,60,295 आरो मोन 66,095 अन्जिमानि गरब्रै साखागोनां गारिनि नाम्बार थिसननाय जादों। 2018-19 आव जिला नाङै सोलिनाय नायबिजिरनाय बादिब्ला गुवाहाटी नोगोरमायाव मोन 97,440 गारि थिसननायनि गेजेरजों सिगां सारिनि जायगा आवग्रिदों। बेनि उनाव न'गावआव मोन 36,754 आरो सुनितपुरा मोन 32,458 गारि रेजिजट्रेसन जादों। गुवाहाटी नोगोरमा जिलायावनो अ'जायै गं 7,000-9,000 मटर गारिनि खारि आरो 2019 माइथायनि आगष्ट दानसिम राज्योआव गं 45,000 गारिनि खारि थिसनजादों।
" दि सेन्टिनेल " खौरांलाइजों मुगा मुगियाव सासे बिबानगिरिया बुंथिदोंदि बे बोसोराव राज्योआव गोबां बिबांनि मथर गारिनि रेजिजट्रेसन जानाया सोमोनांथाव खालामदों आरो बे बादि आबहावाया मथर गारिनि मेला खुंफुंनाय आरो बेंकनि दाहार लानायाबो गार्लै जागोन। बिथांनि बादिब्ला बेबादि हालोदाव मिडिल क्लास फेमिलिखौ गारि लानायाव गोरलै जागोन। इं 2019 माइथायाव आसाम सोरखारनि हान्थामेला बिफाननि आजावनाय गारि मथर ( सोदांनाय ) आइन 2019 माइथायाव ट्रेफिक आइन जाबसिननायनि उनाव सावगारिया सोलायनोबो हागौ। बिथांआ दाजाबदेरना बुंहरो दि बेनि थाखाय सोरखारनि फ्राय बे आइननि सायाव जेबो फोसावलाइ मोननाय जायाखै।
