साहा लक्षिमपुर मिउनिसिपाल बर्ड( एन एल एम बि ) आ सोहोरखौ साखोन सिखोन साखोनै लाखिनो बायदि बायदि राहा लानायखौ नुनो मोननाय जादों। मख'जाथावदि बर्डआ आजावनाय सिखोन साखोन मावफारिनि बाहागो महरै नोगोर ओनसोलनि सिङाव थानाय न'नि दाखोर दाला साबस्रांनायनि थिरांथा लायो। बेखौ मोगथां गाहामै गाहाम जाफुंसार होनायनि थांखि लाना लामानि दथायाव दान्दिसे आरो अरायथायै फज'नाय मैला गारग्रा आइजें एबा डास्टबिनखौ जानगाराव दोन्थ'नाय जादों आरो लामायाव गाज्रि मुवा गारनायखौ बन्द खालामो। टाउन एरियानि बेन्दोंङाव थानाय नोगोरारिखौ बायटिक आरो नन बायटिक मुवाफोरखौ आलादा खालामनो खावलायो । गाज्रि एबा दाखोर दाला गारजानाय मुवाखौ बिगियानारि खान्थिजों लामा लुफुंनाय खामानियाव बाहायनाय जागोन।
नुमलिगर सोदांंसालि लिमिटेडा गंथाम फिसा महरनि हाइद्रलिक भेन खौ दान महरै होदोंमोन। बे भेननि खाबुआ जादों खना खन्ला ओनसोलाव हाबनानै गावसोरनि सिबिथाय होलांनो हागोन।
साहा लक्षिमपुर मिउनिसिपाल बर्डा लानाय थिरांथा बादियै सोहोरखौ गुबुंले खालामग्रा सुबुंखौ फाइन फज'नाय जागोन। जुदि सोरबाया सोहोराव सेवगार मुवा, मैला गोनां दाखोर दाला गारहैयोब्ला साजा होनाय जरिमाना फज'होनाय जासिगोन । गुबुनफारसे थिं, जायगाखौ मैला खालामग्रा सुबुंखौ 50 जौखोन्दो नि साजा होनाय जागोन आरो सोरबा फट' दिखांनानै दैथायहरग्रा सुबुंखौ बान्था होजागोन आरो बिथांनि मुं थाखोमाना लाखिनाय जागोन होनना बर्डनि मावबिबानगोरा मोना मिथिहोयो।
साहा लक्षिमपुर मिउनिसिपाल बर्डा आजावनाय थिरांथा बादिब्ला लामा गाज्रि खालामनाय, उदांयै मैला खालामनाय, लामानि जिब-जुनारखौ जाग्रा मुवा हरग्रा सुबुंखौ 500 रां जुरिमाना जाबसिननाय जागोन। राज्यो थुबुरथिलियाव जि सुनाय, दुगैनाय आरो खिहांनाय सुबुंखौ 300 रां जाबसिन्नाय जासिगोन।
बेराफारसे थिं, राज्योआरि थुबुरथिलियाव खुदै गारोब्ला 200 रां, फालांगियारि फसंथाना दाखोर दाला गारहोवाब्ला 1000 रां जाबसिननाय जादों।
थिग बिदिनो फोजोंग्रा मुवा गारहैयोब्ला 200 रां, बेदर फानग्रा आरो ना फानगिरिया गोजानाव गाराब्ला 750 रां आरो नख'रनि दरखं मोखाङाव गारग्रा लाखियाब्ला 500 रां जाबसिन्नाय जासिगोन। मख'जाथावदि बे बिथोनखौ साहा लक्षिमपुर मिउनिसिपाल बर्डआ फैगो 2 अक्ट'बरनि फ्राय मावफुं महर होनाय जागोन होनना मिथिहोयो ।
