गाहाइ मन्थ्रि नरेन्द्र मडिया आसामाव आगान होयोब्ला सोमावसारनाय हाबाफारि लागोन : आसु

Guwahati : फैगो गोदान 2020 माइथायनि गिबि दान अदेबानि 10 जानुवारी खालिनिफ्राय आसामाव जागायजेन्नो गोनां "खेलो इन्डिया" (Khelo India) फोर्बोयाव हादोरनि गाहाइ मन्थ्रि (PM) नरेन्द्र मडिया नुजाथिफैयोब्ला गोख्रों सोमावसारनाय थासारिजों मुगा मुगि जागोन होन्ना दुलाराय आसाम फरायसा आफादनि दैदेनगिरि मोना सोगोमथि होयो। लोगोसे 5 जानुवारीयाव खुंफुं जानो गोनां खाथि नोजोरजों नायगासिनो दं। आरोबाव फिन दाजाबदेरनानै बुंथियो दि आसामनि गिबि मन्थ्रि (CM) सर्बानन्द सन'वाल आरो रांखान्थि बिफाननि मन्थ्रि ड° हिमन्त बिश्व शर्मा सानै दैदेनगिरिखौ सेलेन्ज होनानै बुङो दि मोनसे थि फोरमानथिखौ होनो खावलायो। मख'जाथावदि बायदि बायदि मेल मिथिं एबा खौरां बिजोंनि गेजेरजों फरायसा आफादनि दैदेनगिरि मोना नोगोरारि सोदांफिन्नाय आइननि गेजेरजों नंखाय बाखाय एबा राज्यो राजाखौ गोरोन्थि लामाजों आन्दायदों होन्ना बुंनाय सोरखारनि अ'जद दैखांनायखौ लानानै बे फिन्नायखौ रोखायै होयो आसुआ।

रायखांनो गोनां दि नोगोरारि सोदांफिन्नाय आइन (Citizenship Amendment Act) खौ लानानै आसामनि दाब दाब जायगायाव राव, हारिमु , दोहोरोम सायख'वालासे गासैबो थाखोनि राज्यो-राजाया बेरेखा खालामनानै सोमावसारनाय हाबाफारियाव लैहोर लैहोर बाहागो लाफैदों। जेराव आसामनि आबहावाया दासान्दि फारियै मिजिंथियै जाथायजों मुगा मुगि जादों। जुनियायै खुंथाइ गोहोयाव जिरायनाय भारतीय जनता पार्ति सुंद'यै बि जे पि नि सुबुं थान्दै मोना माखासे बेले बेजे गोनां थासारियाव मुगा मुगि जानांनो गोनां जादों। दुलाराय आसाम फरायसा आफादनि दैदेनगिरि मोननि नुजाथिनायाव गाहाइ बोसोनगिरि (AASU Adviser) ड° समुज्जल कुमार भट्टाचार्य बिथांआ खौरांगिरिनि सिगाङाव बुङो दि मिरु न'खर बिफाननि मन्थ्रि ( Union Home Minister) अमित चाह बिथाङा सिगाङावनो सिमान खालामदों दि आसाम आरो सा-सानजा हालामाव नोगोरारि सोदांफिन्नाय आइन मोगथां महराव जाफुंसार जायोब्ला गाज्रि थासारिजों मुगा मुगि जागोन। आरो बै दान्थे बिदान्थे गोनां आइनखौनो आसामाव जाबसिन्ना होनो सिगांदों। जों बेवहायनिफ्रायनो बेले बेजे गोनां नोगोरारि सोदांफिन्नाय आइनखौ बोखारहरनो दाबि दैखांदों।

गिबि मन्थ्रि सर्बानन्द सन'वाल बिथांआ बुंदों दि बे आइननि गेजेरजों खम अन्जिमानि सुबुंआ हाबफैगोन नाथाय बिनि (सर्बानन्द) केबिनेट मन्थ्रि (Minister) हिमन्त बिश्व शर्माया 5 लाख सुबुं हाबफैगोन होन्ना फोरमायदों। बे फोरमायनाया राज्यो-राजाखौ गोनो गोथो खालामदों। ओंखायनो बायदि बायदि फोरमायनाय खारिथिनि सायाव राज्योखौ सोरखारा मोनसे नंथारगौ फोरमानथि होनो खावलायदों। नोगोरारि सोदांफिन्नाय आइनखौ बेरेखा खालामनानै राजा लामायाव ओंखारफैनाय सोमावसारगिरिनि सायाव गुलि गावथारनाय खोथाखौ गोसोखांनानै दैदेनगिरिया बुङो दि सोरखारा सुबुंदारारि अहिंसा खान्थिजों सोमावसारनायनि ओंथि बुजिया। गोजोन हास्थायग्रा राज्यो-राजानि सायाव पुलिस रैखाथि थिसननानै गावनि गोहो बोलो दिन्थिनाया थारैनो दुखुनांथाव आरो निन्दा गोनां। सोरखारा थोंजोङै सुबुं बेरेखा थांखियाव नांथाबदों होन्ना सोंखारियो। बि जे पि नि बान्जायनायाव दाब दाब गोजोन हान्जा सुरगिदिंनायखौ मख'लांनानै फोरमायो दि आसामाव गोजोन सोमजियाखै, गोजोन थासारि सोमजिगोन जेब्ला सोरखारा अस'मिया सुबुं माहारिनि राव , हारिमु दोहोरोम ,गांनाय उखैनायखौ फोजोबस्रांनो हाथाव नोगोरारि सोदांफिन्नाय आइनखौ आसामनिफ्राय बोखारनाय जागोन।

Also Read: गुवाहाटी हाइकर्टआ ट्राइबेल बेल्ट आरो ब्लकनिफ्राय गुबुनारिखौ बोख्लाय हरनो बिथोन

Also Watch: Anti-CAA protests: AASU and Artistes Society of Assam jointly conducts protest meeting in Sualkuchi