Guwahati : आसाम प्रदेश कंग्रेस कमिटि सुंद'यै ए पि पि सि आ नोगोरारि सोदांनाय आइनखौ लानानै मन्थ्रि हिमन्त बिश्व शर्माया कंग्रेस दोलोखौ सावरायनानै बुंथिनाय अ'जदखौ रिपुन बराया सोंखारिदों। मख'जाथावदि मैया अदेबानि बुधबार खालि गुवाहाटी नोगोरमानि जि एस रडनि ए बि सि आव थानाय आसाम प्रदेश कंग्रेस कमिटिनि गाहाइ मावख'वाव खुंफुंजानाय मोनसे खौरांगिरि मेलनि गेजेरजों आफादगिरि रिपुन बरा बिथाङा थांनाय समफोराव जालांनाय राज्योनि दाब दाब जायगायाव नोगोरारि सोदांनाय आइनखौ लानानै सोमजिनाय गुलुं गुजुं थासारिनि आन्दोआव गाहाइ बेरेखा राजखान्थि दोलोनि मासियाव जिरायफैनाय कंग्रेस दोलोनि मावथिफोरा लोब्बा थानाय होन्ना आसामनि रांखान्थि बिफाननि मन्थ्रि ड° हिमन्त बिश्व शर्मा बिथाङा अ'जद दैखांनायखौ बराया सोंखारियो।
मख'जाथावदि मन्थ्रि बिथाङा गोहो बोलो नारसिन्नानै कंग्रेस मावथिफोरखौ नांथाबना होनो नाजादों। जनता भबन लांगोनायाव अहिंसा जाथायाव लोब्बा थानाय दायाव जाबसिन्नो नागिरदों। बे जाथायनि थाखायनो मन्थ्रिखौ निन्दा खालामदों। नोगोरारि सोदांनाय आइन बेरेखा सोमावसारनायाव सरासनस्रा सोमावसारगिरि राज्यो-राजाखौ जों मदद खालामफैदों नाथाय जों अहिंसा जाथायाव लोब्बा गैया। मन्थ्रि बिथाङा नंखाय बाखाय अ'जद दैखांनायाव एक्सपार्ट आखल आखुनि होन्ना सोंखारियो।
दा बावैसो सिगांआव दुलाराय आसाम माइन'रिटि फरायसा आफादनि दैदेनगिरि मोननि थान्दै हान्जाया मिरु न'खर बिफाननि मन्थ्रि अमित चाह बिथांजों मोनसे सावराय जथुमाव बाहागो लाहैदोंमोन। जेराव मन्थ्रि ड° हिमन्त बिश्व शर्मा बिथांआबो नुजाथिदोंमोन। बै सावरायनाय जथुम्मायाव गाहाम फिथाय मोनैयाव एबा थागिबि सुबुं बेरेखा आइनखौ सोरखारा सिगांलांनाय थिरांथायाव फिन सोमावसारनायनि हाबाफारि आखायाव लादोंमोन। जों जागायजेननायनिफ्राय नोगोरारि सोदांनाय आइननि हेंथायै गोख्रों सोमावसारनाय हाबाफारि दिन्थिफुंदों, आरो का खौ बोखारहरा सिमहालागै जोंनि सुबुंदारारि अहिंसा खान्थिजों सोमावसारनाया गोख्रोंनिफ्राय गोख्रोंसिन महर होनाय जागोन।
बेराफारसे थिं जाय आसामनि रांखान्थि बिफाननि मन्थ्रि ड° हिमन्त बिश्व शर्मा बिथाङा नोगोरारि सोदांनाय आइननि हेंथायै सोमजिनाय अहिंसा जाथायखौ नोजोर लाखिनानै नायबिजिरनो थाखाय जर'खा संगालि हान्जा (Special Investigation Team) दाफुंनायनि सायाव बिथा खालामनानै ए पि पि सि नि आफादगिरि रिपुन बरा बिथाङा बुङो दि जों (कंग्रेस दोलो) जौसिन बिजिरसालिनि आयेन बिजिरगिरिनि नोजोरजों नायबिजिरनो खावलायदों। लोगोसे जनता भबननि लांगोनायाव जाफ्लेनाय अहिंसा जाथायाव सासे मेलेमजिबिनि मुं बुंनायनिफ्राय मानो जानगाराव थाबाय होन्ना सोंथि दिखाङो ? शर्मा बिथांआ सुबुंदारारि खान्थिजों दैदेनलांनाय राज्यो-राजानि सोमावसारनायखौ ब्लेकमेइल खालामनो नागिरदों।
लोगोसे साफ्रोमबो महरगिरि समाजखौ 50 रोजा रां बान्था महरै रानहोनानै नोगोरारि सोदांनाय आइननि हेंथायै सोमावसारनायनि गारांखौ होबथानो नागिरदों। नाथाय बे का बेरेखा सोमावसारनाया थाद'नाय नङा, जेब्ला सिम "का "खौ बोखारहरा अब्लासिम सोमावसारनाया गोख्रोंनिफ्राय गोख्रोंसिन महराव सोलिगोन होनना हुमखि होयो।
