आसामाव नोगोरारि सोदांनाय आइनखौ गनायथि होयोब्ला आं थैलांगोन : जुबिन गार्ग

Guwahati : नोगोरारि सोदांनाय आइन 2019 खौ बेरेखा खालामनायनि बिथायाव दासिमाव आसामनि दाब दाब जायगायाव सुबुंदारारि खान्थिजों सोमावसारनाया आन्थोरगैयै जासे सोलिगासिनो दं। लोगोसे हारिमुवारि बिथिंनि मेथाइ रोजाबगिरि समाजाबो समान समानै आवगायलांदों जांख्रिखांनाय हाबाफारि। थिग बे समावनो राज्योनि बयजोंबो मिथिजानाय मेथाइ रोजाबगिरि जुबिन गार्ग बुङो दि नोगोरारि सोदांनाय आइननि थैलांनो हागौ होन्ना बुंथियो।

हादोरनि खुंथाइ गोहोआव जिरायनाय भारतीय जनता पार्ति सुंद'यै बि जे पि नि दैदेननाय मिरु आरो हादोरसा सोरखारा गोख्रों रावजों सोंखारियो‌। आसामनि रोजा रोजा राज्यो-राजानि गाबख्रावनाय एबा सोमावसारनाय रावखौ खोनासंनो नांगोन होन्ना खौरांगिरिनि सिगाङाव फोरमायो।

नोगोरारि सोदांनाय आइनखौ गनायथि होयोब्ला आं थैलांनोबो गिया। आसामनि सोरखारा राज्यो-राजानि दुखु दाहाखौ बुजिनो नांगौ, उन्दै उन्दै बैसोनि गथ'नि दुखुखौ बुजिनाया गाहाम।

लोगोसे आरोबाव दाजाबदेरनानै बुंबावो दि आसामनि महरगिरि गौथुम (Artist Association of Assam) आ दासिमाव राज्योनि हालोदखौ दुंहाव एबा गुलुं गुजुं थासारि सोमजिहोनाय नोगोरारि सोदांनाय आइन नि हेंथायै जौसिन बिजिरसालि (Supreme Court) याव आर'ज लाइ (Petition) गाबहरगोन। लोगोसे गासैबो मेथाइ रोजाबगिरि समाजा जौसिन बिजिरसालियाव नुजाथिनायनि थाखाय साखा फारा जादों। बे बादि हालोदाव दुगालु आखल आखु दिन्थिबाय थायोब्ला फैगो 2021 माइथायाव जानो गोनां बिधान सभानि बिसायख'थियाव सोरखार दाफुंनाय सिमांआ फेलें जागोन होन्ना फोरमायो।

मख'जाथावदि थांनाय साननै थामनिफ्राय गुवाहाटी नोगोरमानि सान्दमारियाव थानाय आसाम इन्जिनियारिं गेलेग्रा फोथाराव दुलाराय आसाम फरायसा आफादनि बान्जायनायाव सावथुन मुलुगनि फावखुंगुर फावखुंग्रि फोरा बायदिसिना सोमावसारनाय, सय्ताग्रह हाबाफारियाव बाहागो लानानै बि जे पि सोरखारनि हेंथायै गारांसेयै गाबज्रिदों जोंनो का नाङा, जों मानिनानै लानो हासिना , बि जे पि सोरखार बेरेखा बायदि बायदि स्ल'गानजों खुद्रिसारनानै गोमखांहोदोंमोन।

Also Read : हिन्दु गुबुनारिया भारतारि नोगोरारिनि गनायथि मोन्नायाव जिंगासिदों: प्रफुल्ल कुमार महन्तआ

Also Watch: RD Junior College Students Stage Massive Protest against CAB