हादोरसायाव सोलिफु दाननि गेजेराव बिसायख'थिनि बार नांदों। गाहायै राज्योनि गंब्रै बिधान सभा बियाबाव खुंथाइ गोहोआव थानाय राजखान्थि दोलो भारतीय जनता पार्ति जों लोगोसे गाहाइ बेरेखा राजखान्थि गोहो कंग्रेस आरो ए आइ उ डि एफ नि दैदेनगिरि मावथि मददगिरिनि गोसोयाव बिसायख'थिनि बार नांनायखौ नुनो मोननाय जादों। देग्लाय गंब्रै बिधान सभा बियाबाव गासै सा 6,78,898 भ'ट होगिरि राज्यो-राजाया गावनि राजखान्थियारि मोनथाइखौ रोखा खालामगोन। बे गंब्रै बिधान सभा बियाबाव सा 20 बिजाथिफोरा बिसायख'थियाव गसंथेदों। बे बाइ इलेक्सना फैगो 21 अक्ट'बराव खुंफुं जागोन आरो 24 अक्ट'बराव बिसायख'थि दावहानि फिथायखौ फोसावगोन होनना खौरां बिजोंनि गेजेरजों फोरमाय जादों। मख'जाथावदि फैगो 2021 माइथायनि गेजेराव आसाम बिधान सभा बिसायख'थि खुंफुं जासिगोन।
आसाम प्रदेश बिसायख'थि आयोग ( Assam State Election Commission) नि बिबानगोराया मिथिहोदों दि गुवाहाटी मिउनिसिपालटि कर्परेसन सुंद'यै GMC नि बिबान सम (Tenure) थांनाय 2018 माइथायायनि जुन दानावनो थुंगिदों। नाथाय दासिम हालागै बिसायख'थि खुंफुं जाथ'वाखै।
गुवाहाटी मिउनिसिपालटि कर्परेसन सुंद'यै GMC बिसायख'थिखौ गिबियै गं 31 वार्डावनो इलेक्सन खुंबोदोंमोन बिसायख'थि आयोगनि जोहै। नाथाय उनाव आसाम मन्थ्रि केबिनेटआ वार्ड 60 सिम बारायबोनाय जादों। आसाम हादोरसा बिसायख'थि आयोग राज्योआव बायदिसिना अल'खद एबा एंगारनो हायै जाहोननि थाखाय फावसायना दंमोन। बेफोरनि गेजेराव हादोरारि नोगोरारि फारिलाइ खामानि आरो दैबानानि थाखाय थि समाव बिसायख'थिखौ खुंफुंनो हायाखै होनना फोरमायथिदों।
राज्यो सोरखारनिफ्राय मोनथिनो हानाय मोनसे फोथायथाव फुंखानि बादिब्ला 2020 नि जानुवारि फेब्रुवारियाव गुवाहाटी मिउनिसिपालटि कर्परेसन सुंद'यै GMC नि बिसायख'थिखौ खुंफुंलांनो हागौ।
बेरा फारसेथिं बर'लेण्ड हायुंआरि गौथुम (Bodoland Territorial Council) बिसायख'थिया फैगो 2020 माइथायनि एप्रिल दानाव खुंफुं जानायनि खोथाया मोनसे सुलुंङाव फोरमायजादोंं। मख'जाथावदि बयनिख्रुइबो गोनांथार बिसायख'थिया जाबाय हादोरसानि मिउनिसिपालटि बर्ड आरो टाउन कमिटि नि बिबान सम फैगो 2020 नि गेजेराव जोबसिगोन। बेवहाय राज्योनि गासै गं 32 मिउनिसिपालटि बर्ड आरो 42 टाउन कमिटि लोगोसे गं 746 वार्डाव बिसायख'थि खुंजानायनि खोथा। आसाम प्रदेश भारतीय जनता पार्ति सुंद'यै बि जे पि नि दैदेनगिरि सासेया फोरमाय हरनाय बादिब्ला मोनथाम बिसायख'थि फारियै बर'लेण्ड हायुंआरि गौथुम, गुवाहाटी मिउनिसिपालटि कर्परेसन आरो राज्योनि मिउनिसिपाल बर्ड, टाउन कमिटि नि बिसायख'थियाव सोरखारनि लोगो राजखान्थि गोहो असम गण परिषद आरो बर'लेण्ड पिपल्स फ्रन्टनि दैदेनगिरि मददगिरिफोरनि हेफाजाबाव जयैनो गावनि दोलोआ सायखनाय बिजाथिनि मददजों देरहानाय नि थांखियै बिसायख'थि दावहायाव ओंखारगोन। जोंनि साफ्रोमबो दोलोनि मावथि दैदेनगिरि मददगिरिनि आबुङै फोथायनाय दं दि बाइ इलेक्सन जानो गोनां राज्योनि गं बिधान सभा बियाबाव देरहागोन। बे देरहानायानो फैगो बिधान सभा बियाब बिसायख'थियाव दोलोनि देरहानाय नि लामाखौ गोरलै खालामगोन।
Also Watch: Union Coal and Mines Minister Pralhad Joshi addresses media in Margherita