मिरु न'खर बिफाननि मन्थ्रि अमित चाहया दिनै ल'क सभायाव दान्थे बिदान्थे गोनां केबखौ लाबोगोन

New Delhi: मिरु न'खर बिफाननि मन्थ्रि अमित चाह बिथाङा दान्थे बिदान्थे गोनां नोगोरारि सोदांनाय बिलखौ ल'क सभायाव लाबोथारनो थाखाय सिगांलांदों बेयो रोखाथार। बेनि थाखाय खुंथाइ गोहोयाव जिरायनाय भारतीय जनता पार्ति सुंद'यै बि जे पि नि सांसद (BJP MP) फोरखौ संसदाव नुजाथिफैनायनि हुइप फोसावनाय जादों। सोलिफु दाननि 9 निफ्राय 11 डिसेम्बरसिम बे हुइपखौ फोसावदों होन्ना दोलोनि सुलुंङाव फोरमायजादों।

मख'जाथावदि थांनाय बुधबार खालि मिरु केबिनेट जथुमाव (Cabinet Meeting) सावरायनायनि गेजेरजों बे थिरांथाखौ आजावनाय जायो। सावराय जथुम थुंगिनायनि उनाव मिरु खारिथि आरो फोसाव बिजों बिफाननि मन्थ्रि (Information And Broadcasting Minister) प्रकाश जाभेदकार बिथाङा बुङो दि नोगोरारि सोदांनाय बिल (CAB) खौ हादोरनि गाहाम इयुनखौ सान्नानै लानाय जादों।

लोगोसे बिथाङा दाजाबदेरनानै बुंबावो दि आंहा फोथायनाय दं, नोगोरारि सोदांनाय बिलखौ आसाम, सा-सानजा हादोरसाजों लोगोसे दुलाराय हादोरनि साफ्रोमबो सुबुंआ बरायगोन।

सा-सानजा हादोरसा (North Eastern States) नि गेजेराव दं फारियै अरुनाचल प्रदेश, नागालेण्ड आरो मिजरामाव सिंआव हाबसन्नायनि गनायथि (Inner Line Permit) थाफागोन। अदेबानि बे बिल मोनबो रोखोमनि खहा खालामनो हानाय नङा।

बे राजखान्थियारि सांग्रांथि गोनां बिलखौ लानानै दासिम हालागै बेरेखा राजखान्थि दोलोनि दैदेनगिरि,सांसद मोना हेंथा खालामगासिनो दं। बेयो सा-सानजा हादोरसानि गेजेराव आसाम, मेधालय आरो त्रिपुरानि ट्राइबेल गोगोम हालामाव जानगाराव थागोन एबा गोहोम खोख्लैया होन्ना सुलुंआव फोरमाय जादों। मानोना बै ट्राइबेल हालामनि आवथायाव थानाय जिला गौथुम (District Council) आरो गावखुंथाइ गौथुमा (Autonomous Council) भारतनि संबिजिदनि 8 (दाइन) थि फारिलाय (8th Schedule of the Indian Constitution) आव सोसनफिन्नाय।

नोगोरारि सोदांनाय बिल (Citizenship Amendment Bill) 2019 आ बांलादेश, आफगानिस्तान आरो पाकिस्तानाव दोहोरोमनि बेलायाव हालाय हाफाय थासारिजों भुगिनांनाय आरो खारखोमालांनाय दुखुथिया हिन्दु, सिख, खृष्टान,पार्सिस आरो जैन सुबुं माहारिखौ रैखाथिजों भारतारि नोगोरारिनि मानदान्दा गनायथि होगोन। जाय जाथायखौ हादोरनि बेरेखा राजखान्थि हान्जायाव जिरायनाय भारतीय जातीय कंग्रेस दोलोआ बेरेखा खालामदों। बे गमामायैनो संबिजित बेरेखा, आसाम गोरोबथाखौ खहा खालामगोन होन्ना फोरमायहरदों।

Also Read: उन्नाव हान्जा जिनाहारि मुगैथाव जाथायनि बुलि जानाय हिन्जावा 40 धन्टानि उनाव जोबथा हां गारबाय

Also Watch: CITU, SFI, AIKS, AIDWA,DYFI among others stage protest against BJP Government in Assam