गुवाहाटिः आसाम हादोरसायाव मावनो लानाय गोबां बिथांखिफोरा दाबोनो जाफुंजोबाखै, जायनि थाखाय सुबुफोरनि माबा मोनसे मुलाम्फाफोरनि थाखाय। बोसोरफोराव बेफोरनि मावनायफोरा गोग्लैसोना दं।
आसाम सोरखरा बेफोर बिथांखिफोर आरो स्किमफोरखौ मावनो थाखाय गोबां रांनि बिबां लाना बेफोरनि थाखाय खरसा खालामदों। जायनि थाखाय लुफुंजानाय एबा मावनो लानाय बिथांखिफोरनि खामानिफोरा आबुं जाजोबालासिनो ओरैनो गोग्लैसोना थानायखौ नुनो मोननाय जादों। बेफोरखौ बानायनो हायैनि गुबै जाहाना रांफोरखौ बिथांखिफोरनि सोलायै ओरैनो हगारहरदोंनामा होनना सोंथि जाखांओ।
आसाम हादोरसायाव बेफोर बिथांखिफोरनि सायाव जेबो फोरमान गैया ।
₹ 5.6 कौटि रां बाजेद, धुबुरि जिल्लायाव किसमाथासधा मदेल हसपिटल लुनायनि बिथांखि बादियै थांनाय बोसोरफोरावनो मावफुंजादों। दा नाथाय बे देहा फाहामसालिया दासिमबो बेखेवजायाखै एबा जागायाखै। जायनि थाखाय देहाफाहामसालिआ ओरैनो गोग्लैसोना दं।
2016 माइथायाव दरं जिल्लानि सिंआव थानाय मंगलदैनि गेरिबारि आइ.टि.आइ (ITI) आ बेखेवजादों। मोन्थिनाय बादिब्ला बे सोलोंसालिआव टेकनिकेल सोलों आगजुफोरा ओरैनो गोग्लैसोना थादों। दासिमबो मोजां राहाथिफोर होनो हायैनि थाखायनो थाखो खालामनो हानाय जायाखै। जायनि थाखाय खेबसेयैनो थाखोखौ गासैनिबो थाखाय खालामगोन नामा ?
आसाम अरनाचल सिमना ओनसोलाव थानाय धिराकावबो बे बादिनो गंसे आइ.टि.आइ.(ITI) फरायसालिखौ थांनाय नै बोसोरनि सिगांआवनो लुखांजोबबाय। बेयावबो समान जेंनाखौनो नुनो मोन्दों। रावबो बेखौ बुंनो हाया जायनि थाखाय थाखोआ माब्ला आइ.टि.आइ.(ITI) नि राहाथिफोरखौ मोननानै थाखो जागायगोन।
2013 माइथायाव दरं जिल्लानि सामथिपारा जायगायाव दै जगायनायनि मोनसे माव बिथांखिखौ जाफुंहोदों। जायनि थाखाय मोब्लिबआरिनि असबिदायाव दैखौ रानना होनो हायाखै आरो ओरैनो दा जना दं।
आसाम सोरखारा 2016 माइथायाव देहा आरो आदारनि मावफुं बिथांखिखौ खालामदोंमोन। बेफोरखौ नायफिनि एबा बेनि सायाव खामानि मावनाय एबा सुबुंफोरनि खौसेथिनि आंखालनि थाखायनो ओरैनो दं।
2003 माइथायाव राहा बियाबनि सिंआव थानाय चापारमुख आरो काचापाराघाट नि गेजेराव अन्थाय दालां बानायनायनि माव बिथांखिआ दासिमबो आद्रा थानायखौ नुनो मोन्दों होनना फोरमायदों।
मावखुलिनि फुंखानि बादियैब्ला हसपिटल, आइ.टि.आइ. (ITI) बायदि बायदि फोरनि मावफुंनाय फान्द आरो रांफोरा मिरु सोरखारनि बायदि रोखोम माव बिथांखिफैरजोंसो मावजायो जायनि थाखाय आसाम होदोरसायाव बेफोर बादि माखासे मावबिथांखिफोर दं जायफोरा जाजेननायनिफ्रायनो ओरैनो गोग्लैसोना दं बेफोरनि थाखाय सोरखारा खामनि मावग्रा सोसनथाय थांखिखौ लानांगौमोन। गोबां जाथाय दं, जायफोर माव बिथांखिफोरखौ मावनो थाखाय अन्थाय फसंना दोननाय जादों जाय राजखान्थिगिरिफोरनि खुन्थिया महरै। हादोरसा सोरखारा बेखायनो गुबुन गोदान मावनो लानायनि सिगां बेफोर ओरैनो गोग्लैसोना थानाय बिथिंफोरखौ जाफुंहोग्रोगोन आरो बाहायजाथाव खालामगोन।
