कक्राझार: आफां आसाम आरो बर'लेण्ड हालामनि गंसेल' नायल' जाल' गोजौ सोलोंथाइ फसंथान बर'लेण्ड मुलुग सोलोंसालिनि खायफा माव बिबानगिरिमोन नि मुलुग सोलोंसालि नि भाइस चेन्सेलरनि हेंथायै अ'जद थिखांनाया जाथायखौ लाना मिरु दुलाराय बर' फरायसा आफाद सुंदयै एबसु गोथौयै दुखु मोननाय फोरमायदों। जाय मुलुग सोलोंसालि नि खुंथायारि खामानि मावलांनायाव जेबो हस्तक्षेप नुजानो नङामोन।
मिरु दुलाराय बर' फरायसा आफादनि लोगो गाहाइ नेहाथारि खोरोमदाव ओवारि आरो सोलोंथाइ नेहाथारि कास्तम बसुमतारीया सुक्रबार खालि सानैया गावसोरनि बिबुंथियाव फोरमायलांङो बर'लेण्ड हालामनि गंसेल' नायल' जाल' गोजौ सोलोंथाइ फसंथान बर'लेण्ड मुलुग सोलोंसालिनि नि मान मर्यदाखौ गाहायसिन थार लाबोनो नाजादों होनना माखासे सुबुंनि फ्राय मिथिनो मोनदों। खौरां बिजोंनि फ्राय मोननाय सुलुंनि बादिब्ला मुलुग सोलोंसालिनि भाइस चेन्सेलरनि हेंथायै फाव फान्दायदों।
मुलुग सोलोंसालिनि भाइस चेन्सेलरनि हेंथायै थिखांजानाय मान सन्मान हायसिनलांनाय जाथाय बेनो गिबि बिदि नंङा बेनि आगोलावबो लोब्बा गोनां जाथाया सोमजिदोंमोन।
एबसुनि लोगो गाहाइ नेहाथारि वारि बिथांआ मिजिंथिना बुंथियो गोख्रों सामलायगिरि फैनानै मुलुग सोलोंसालिनि मान मर्यदाखौ थियै लाखिनानै जौगासार लामाथिं दावखो लांगोन। दासिमाव बर'लेण्ड मुलुग सोलोंसालि बर'लेण्ड हालामजों लोगोसे आफां आसामनि गंसे गोजौ सारिनि सोलोंथाइ फसंथान। जाय मुलुग सोलोंसालि अनसुंथाइ आयोग सुंद'यै UGC नि आवथायाव 12 बि मानथाखोनि थाखाय नेनायनि लामायाव दंसै। बिथांआ लोगोसे मख'लांङो बिबुंगोरा आरो गुबुन गुबुन मावथिफारिया थिसननाय बायदिसिना आयदानि सायाव नांगौथार गासिबो रोखोमनि राहा लाहैनो नांगौ।
मिरु दुलाराय बर' फरायसा आफादनि लोगो गाहाइ नेहाथारि खोरोमदाव ओवारिआ बुंथियो दा बावैसो सिगां हान्जानि नायबिजिरनायाव खायफा मुलुग सोलोंसालिनि मावथिफारियाफोरनि हैंथायै अजद मोनहैदों। भाइस चेन्सेलरनि हेंथायै नंखाय आरो सोमोन्दो गैयि अ'जद दैखां जानाय जाथाया थारैनो दुखुनांथाव आरो लाजिनांथाव। जाय सोलोंथाइ फसंथान आरो फरायसा समाजनि थाखाय गाज्रि बिदिन्थि।
खोरोमदाव वारि बिथांआ जाथायनि आलम लानानै सोंथियो दि मानो गोजौ थाखोनि खुंथाइ गाहाइ अदेबानि भाइस चेन्सेलर सुंदयै भि सि आ मुलुग सोलोंसालिनि खामानि मावनायावबो मेगन नोजोराव गोलैबाय। मानोना मुलुग सोलोंसालिनि भाइस चेन्सेलरनि बेफोर आयदाफोरखौ हेंथा खालामनाय आरो नायसननायनि आबुं गोहो दं।
बर'लेण्ड मुलुग सोलोंसालिनि सिंनि खामानियाव नांथाबना थानाय साफा साफा मावबिबानगोरा फोरा मुलुग सोलोंसालिनि जौगानायनि थाखाय मान मर्यदा आरो गोजोन आबहावाखौ थियै लाखिनानै मोजांङै मोजांङै सामलायलांनो दुलाराय बर' फरायसा आफादनि दैदेनगिरि हांख्रायहरो। जाहाथे आफां आसाम आरो बि टि सि हालामाव गंसेल' गोजौ सोलोंथाइ फसंथान नि फरायसा आरो राज्यो-राजानि गाहाम जायो आरो मुलुग थाखो नि मुलुगसोलोंसालिनि महर मोननायाव हेफाजाब जायो।
