Guwahati : गुवाहाटी नोगोरमानि खानापारा जिब जुनार फिसिथाय गेवलां फोथाराव नेसनेल लाइभष्टक आरो पल्वट्रि स्व' 2019 दिन्थिफुंनाय हाबाफारिनि जोबथा सानखालि आसामनि हादोरसा बेंगिरि मानिनां गेदेमा प्रफेसार जगदीश मुखि बिथाङा नुजाथिफैयो। बे हाबाफारियावनो बिथांआ बुंथियो दि हादोर आरो आसाम हादोरसानि लाइभष्टक दारिमिनखौ जौगाखांहोनायनि थाखाय मुलाम्फायारि फालांगिरिजों लोगोआरि सोमोन्दो जों आजावना लानानै खामानि मावलांनो सुबुरुन होयो।
आरोबाव लोगोसे मुखि बिथाङा बुंबावो दि भारत हादोरनि लाइभष्टक दारिमिन खोन्दोआ देरसिन उद्यग, जाय मुलुगनि मादाव 16 जौखोन्दो जायगा आवग्रिनानै दं। मख'जाथावदि भारतनि रांखान्थियारि बिथिङाव लाइभष्टक दारिमिन खोन्दोआ जि डि पि नि 4.11 जौखोन्दो आरो भारतनि हादोरनि आबाद बिथिङाव 25.6 जौखोन्दो बिहोमा होलांदों। मुलुगनि थाखोयाव मैसो अन्जिमा (Buffalo Population) नि गेजेराव भारतनि 56 जौखोन्दो आरो लोगोसे गाइखेर दिहुनथाय (Milk Production)आव गिबि एबा सेथि मासि (Rank) आवग्रिनानै दं। भारत हादोरा दावदै दिहुन्थायाव थामथि मासियाव आवथेनानै अनगायैबो पल्वट्रि प्रडाक्सन बेलायाव 5 थि जायगा आवग्रिगासिनो दं। भारत हादोरनि लाइफष्टकनि बिथिङाव आसाम हादोरसायाल' गासै जिब जुनारनि अन्जिमाया 3.25 जौखोन्दो आरो पल्वट्रि खोन्दोयाव 8.36 जौखोन्दो जायगा आर्जिनो हादों। जुदि बे बिथिङाव गोसो गुदुं राज्यो-राजा आरो इन्टारप्रिउनार फोरा नैबे खोन्दोखौ जौगाखांहोनायाव बिहोमा होलांङो , अब्ला सा-सानजा हालामाव मोनसे गिदिर दारिमिन महरै गायसनलांनाव जाफुंसार जागोन। दाबसे जौगालु हादाब महरै गावखौनो गाव फसंफिन्नो हागोन आरो लाइमोन गोरों-गोरा सुबुंआ गोसो गोर्बोजों मोजांङै खामानियाव नांथाबोब्ला रांखान्थियारि हालोदा गोख्रोंसिन जाबोगोन आरो आनइम्पइलमेन्टनि जेंनाया खमायगोन होन्ना बुंथियो।
भारतनि फरेइन फ'लिसि आव खोला साहा आरो साहा एसियान हादोरफोरजों लोगोसे सा-सानजा हादोरसाफोरनि गेजेराव आसाम आरो गुबुन गुबुन राज्योफोरा हादोरनि जौगाखांनायाव गोनांथार बिहोमा होलांङो। लोगोसे एक्ट इष्ट पलिसि बिथांखियाव मिरु सोरखाराबो जर'खा आगान लानायखौ नुनो मोनदों। लोगोसे गुवाहाटी नोगोरमाखौ खोला साहा एसियान हादोरनि गेजेराव दरखं मोखां महरै गायसंलांनायाव जर'खा खामानि मावलांगासिनो दं।
लोगोसे मानिनां गेदेमा प्रफेसार जगदीश मुखि बिथाङा बुङो दि आसामाव बुर्जा बिबांनि लाइभष्टक अन्जिमा दंखायो, नाथाय दुखुनांथाव खोथाया बेनो दि दिहुनखांनाय आरो दिहुनथायनि गोहोआ जोबोद बाङाइ बिबांनि। ओंखायनो बे खोन्दोखौ जौगाखांनि गोनांथि होनांगौ थाखाय बोसोन होयो। लाइफष्टक बिथिंनि दारिमिन खोन्दोखौ बिगियानारि आरो फालांगियारि थाखोनि स्टेकहल्दार फारियै आबादारिफोर, दारिमिनारि सुबुं, दोलो आफाद, गाव गोसो गौथुम आरो गुबुन गुबुन बिथिंनि राज्यो-राजाखौ जौगाखांहोनायनि गेजेरजों आसामनि दारिमिनारि हालोदखौ सोलायनो दिथा होयो।
रायखांनो गोनां दि राज्यो बेंगिरि जगदीश मुखि बिथाङा बरपेटानि दिपांकर शर्माखौ साबसिन हौवा आबादारि आरो जुना तामुलीखौ साबसिन आयजो आबादारि महरै बान्था रान्नाय जायो। लोगोसे डाइरि फार्मिंनि थाखाय सैलेश चौधुरिखौ , अमा फिसिनायाव दिलिप चेटिया आरो भुपेन डेकाखौ बोरमा फिसिनायनि थाखाय साबसिन थाखोनि बान्था रानहरनाय जायो।
बै नेसनेल लाइभष्टक आरो पल्वट्रि स्व' 2019 दिन्थिफुंनाय हाबाफारियाव आबाद मन्थ्रि अतुल बरा, एम एल ए मोना फारियै सनजय किशान, प्रदिप हाजरिका आरो आसाम आबाद मुलुगसोलोंसालिनि बारग' भाइस चेन्सेलर प्रफेसार के एम बुजरबरुवा, मनज सइकीया मोनजों लोगोसे गोबां गुनगोनां सुबुंफोरा बाहागो लाफैयो।
