गुवाहाटी: आसामनि जिब जुनार फाहामथाय बिगियान आरो आबाद बिफाननि मन्थ्रि अतुल बराया जिब जुनार आंखालथिनि समाव एमबुलेन्स सिबिथायखौ राज्यो राजाया थाबैनो सुबिदा मोनहैगोन।
दिसपुरनि जनता भवनाव सुक्रबार खालि खुंफुंनाय गंसे खौरांमेलाव बिफानारि मन्थ्रि अतुल बरा बिथाङा बुंथियो राज्योआव 108 एमबुलेन्स सिबिथाय बादियै गं 6 लाइभस्टक एमबुलेन्सनि पाइलट प्रजेक्ट बेखेवनाय जासिगोन। बेयो बिफाननि गिबि आगान। बे एमबुलेन्सआव फाहामगिरि आरो गुबुन गुबुन स्टाफोरा मोसौ मैसोनि दुखुवाव फाहामनायनि सुबिदा थाफागोन।
मख'जाथावदि लाइभस्टक एमबुलेन्स गारिया डाक्टारफोर थांफानो हायै जायगाफोराव बे सिबिथायखौ राज्यो राजानो मदद होगोन। जुदि बे गिबिसिनै आजावनाय प्रजेक्ट बिथांखिया जाफुंसार जायोब्ला राज्योनि गुबुन गुबुन जिलायावबो गोसार होनाय जागोन।
दासिम हालागै आसामाव लाइभस्टक सेन्सासखौ आबुं खालामनाय जाबाय। दुलाराय भारताव लानाय बे सेन्सासनि फिथाइखौ भारत सोरखारा उनाव फोसाव जागोन होनना बुंथियो खौरां मेलनि गेजेरजों।
आसाम सोरखारनि जिब जुनार फिसिथाय आरो फाहामथाय बिगियान बिफान आरो आसाम लाइभस्टक आरो पलट्री कर्परेसननि जुथायै बान्जायनायाव हादोरारि लाइभस्टक आरो पलट्री दिन्थिफुंनाय 2019 खौ खानापारायाव थानाय फाहामथाय बिगियान गेलेग्रा फोथाराव नबेम्बरनि 7 निफ्राय 10 सिम खुंफुंनाय जागोन।
बे दिन्थिफुंनाय हाबाफारियाव मावबादा आरो सेमिनारजों लोगोसे फोरोंथाइ जथुम,बायग्रा फानगिरिनि सोमोन्दो लायनाय आरो गुबुन गुबुन हाबाफारि आखायाव लानाय जादों जेराव मिरुनि केबिनेट मन्थ्रि गिरिराज सिं,राज्योनि गिबि मन्थ्रि सर्बानन्द सन'वालबो नुजाथिफैगोन होनना मन्थ्रि बिथाङा बुंथिदों।
मख'जाथावदि बे दिन्थिफुंनाया इं 1995 आव खुंफुंजादोंमोन आरो गोलाव 25 बोसोरनि उनावसो बान्जायनाय जागोन। दिन्थिफुंनाय हाबाफारियाव गासै सा 400 आबादारिया बाहागो लाहैगोन। जिब जुनार फाहामथायनि बेलायाव सा-सानजा नि राज्योनि गुन थानायखौ फोरमान होगोन होनना बुंहरो।
