Guwahati : मोनसे गोख्रों खौसेथि नि भारत हादोर दानायनि सिमां नुगिरि सोरबां सुबुं (Iron Man) सर्दार बल्लभ भाइ पेटेलनि जोनोम सान हादोरजों लोगोसे आसामनि गुवाहाटी नोगोरमायाव मिरुआरियै खौसेथिनि खारनाय (Unity for Run) हाबाफारिजों गोसोखांनाय जायो। बिमा हादोर रैखाथि (Nations Security) , खौसेथि (Unity) आरो थामोनथा (Integrity) नि थार गोख्रों लामा दिन्थिगिरिनि जोनोम सान हादोरारि खौसेथि सान (Rastriya Ekta Diwas) महरै गाजा गोमजायै फालिनाय जायो। जेराव आसामनि गिबि मन्थ्रि (Chief Minister) सर्बानन्द सन'वाल बिथांआ लोगोसे गोबां फावखुंग्रि, गेदेमा सुबुंनि नुजाथिनायाव फिरफिला बिरहोनानै हाबाफारिखौ बेखेवना होयो।
मख'जाथावदि कामरुप मेट्रपलिटान जिला खुंथाइनि बान्जायनायाव गुवाहाटी नोगोरमानि नेहरु ष्टेडियाम लांगोनायाव बृहस्पतिबार खालि गेदेमा सुबुं सर्दार बल्लभ भाइ पेटेलनि जोनोम सानखौ खौसेथि (Run for Unity) जों हाबाफारिजों लोब्बा लाखिनानै खुंफुंनाय सादारन जथुम्मायाव फ्लेग अफ खालामना गिबि मन्थ्रि सर्बानन्द सन'वाल बिथांआ बुंथिबावो दि हादोरखौ गोख्रों दाफुंनो थाखाय बिथांनि आजावनाय सानथौ सानथौ बोजबना लानांगौ आरो हादोरखौ सिगां फार्से दावखोलांनायाव साफ्रोमबो नोगोरारिया आगान सुरनांगौ। बिथां गेदेमा भारत हादोरनि दैदेनगिरि , थार लामा दिन्थिगिरि सोरबां सुबुं सर्दार बल्लभ भाइ पेटेलनि माव दिन्थि जों बोजबनानै हादोरनि गाहाइ मन्थ्रि नरेन्द्र मडि या थांनाय बा बोसोरनि खुंथाइ समाव एक भारत स्रेष्ट भारत दानायनि सदबांसा लानानै खामानि मावलांदों। नरेन्द्र मडिनि गोख्रों दैदेननायनि थाखाय दिनै मुलुगनांङारि थाखोआव भारत हादोरखौ सिनायनो हाबाय। सर्दार बल्लभ भाइ पेटेलानो गंसे गोख्रों भारत हादोर दानायनि बिथा गायसनलांदोंमोन।
रायखांनो गोनां दि गिबि मन्थ्रि सर्बानन्द सन'वाल बिथांआ गुवाहाटी नोगोरमानि खौसेथि खारनाय हाबाफारि नेहरु ष्टेडियाम निफ्राय लता सिल गेलेग्रा फोथारसिम हान्थिनाय जायो। जेराव आसामनि मुंदांखा फावखुंग्रि जतिन बरा जों बारग' जोलुर गेलेगिरि गिलबार्टसन सांमा, जुवेल बे, मिथिजानाय अथ्लेटिक गेलेगिरि तयाबुन नेसा, कुशन लाहन, मिथिजानाय आखान्थि गेलेगिरि कल्पना चौधुरि , बारग' हादोर गेजेरारि गेलेगिरि आलभिस हाजरिका आरो बयजोंबो मिथिजानाय आयजो आरसार गेलेगिरि प्रतिभा बर' मान बावहरनाय जायो।
लोगोसे खौसेथिनि खारनाय हाबाफारियाव डिब्रुगर बिधान सभा बियाबनि एम एल ए प्रसान्ट फुकन, गिबि मन्थ्रि नि आयेन बोसोनगिरि सानतनु भरालि , गेलेमु आरो लाइमोन जौगाखां बिफाननि एदभाइसरि कमिटिनि नेहाथारि सोद्रोमा लक्ष्य कौवर, कामरुप मेट्रपलिटाननि जिला बेंगिरि बिश्वजित पेगु जों लोगोसे गुबुन गुबुन हांख्राइहर जानाय आलासि फोरा नुजाथिफैयो। बेनि उनाव गिबि मन्थ्रि सर्बानन्द सन'वाल बिथांआ जनता भबनाव खुंफुंनाय हादोरारि खौसेथि सान हाबाफारियाव बाहागो लायो ।
