Guwahati : नोगोरारि सोदांनाय आइन (Citizenship Amendment Act) नि हेंथायै आसामनि सोरबिथिं दुंहाव थासारि सोमजिनायखौ नोजोर लाखिनानै सिगांनिफ्राय थिसन्नाय 59 रौनिया हान्जानि अनगायैबो आरोबाव फिन उफ्रा सेन्ट्रेल आर्म पुलिस फर्स (Additional Armed Forces) लाबोनाय जादों होन्ना राज्यो सोरखारनि मोनसे सुलुंआव फोरमाय जादों।
मख'जाथावदि मिरुआ दैथायहर जानाय उफ्रा रौनिया हान्जा (Additional Armed Forces) खौ हादोरसा सोरखारा गोनांथार जानाय जायगाफोराव थिसननाय जागोन। दासिम हालागै हादोरसानि गुबुन गुबुन जिल्लायाव थोजासे अन्जिमानि रौनिया हान्जा थिसन्नायनि उनावबो नागारनाय गैयि दांङाबाजि (Violence) सोलिदोंमोन। ओंखारनो मिरु सोरखारा फारि फारियै बांलांबाय थानाय अहिंसा खान्थिजों दैदेननाय खामानिफोरखौ दबथायनो थाखाय उफ्रा रैखाथि गोहो थिसन्नाय जादोंमोन।
मख'जाथावदि थांनाय 31 आगष्टआव जोबथा हादोरारि नोगोरारि फारिलाइ सुंद'यै एन आर सि फोसाव जानायनि सिगां हादोरसायाव आइन आब्रुथिखौ गोजोन आबहावा (Law & Order Situation) सोरजिनायाव उफ्रा रैखाथि गोहो थिसन्नाय जादोंमोन। एन आर सि फारिलाइ ओंखारनायनि उनाव जेबो गुलुं गुजुं थासारि सोमजियैनि नोजोर लाखिनानै उफ्रा रैखाथि हान्जाखौ बोखारलांनाय जादोंमोन।
दासिमाव नोगोरारि सोदांनाय बिल पास जानायनि उनाव हादोरसानि सिङाव थानाय गुबुन गुबुन जायगाफोराव सोमजिनाय दुंहाव थासारिखौ नोजोर लाखिनानै सानफ्रोमबोनि बिथायाव मिरु न'खर मिनिस्थ्रिया गाहामै गाहाम नायबिजिरगासिनो दं होन्ना मोनथिनाय जादों। मख'जाथावदि नोगोरारि सोदांनाय बिला आइन (Act) नि महर मोन्नायनि उनाव गुवाहाटी नोगोरमाजों लोगोसे राज्योनि आइन आब्रुथि थासारिया फारि फारियै गाज्रिनिफ्राय गाज्रि जालांनायाव भारतारि फाइखि हान्जाया फ्लेक मार्च होदोंमोन।
मख'जाथावदि भारतारि फाइखि हान्जानि गुवाहाटीनि सुबुं फोनांजाब मावख'गोरा (PRO) आ फोसावनाय खौरांनि बादिब्ला आसाम राइफलखौ गुवाहाटी, मरिगाव,सुनितपुर आरो डिब्रुगर जिलानि दुंहाव थासारि सोमजिनाय जायगाफोराव थिसननाय जादोंमोन। दासिम हालागै मोन दाइन रैखाथि हान्जाखौ थिसन्दों, बेफोरनि गेजेराव बङाइगाव आरो मरिगाव जिलायाव हानजासेयै, सुनितपुराव हान्जा से, गुवाहाटी नोगोरमायाव हान्जा ब्रै। मख'जाथावदि हादोरसानि न'खर बिफाना (State Home Department) राज्योआव नोगोरारि सोदांनाय आइन (Citizenship Amendment Act) खौ असिला लानानै माखासे दुथां आखल आखुनि सुबुंआ दुंहाव थासारि, दांङाबाजि सोरजिनायखौ मिजिंथिनानै उफ्रा रैखाथि हान्जा दैथाय हरनाय जादों होन्ना सुलुंआव फोरमाय जादों।
