आसामनि गिबि मन्थ्रि सर्बानन्द सन'वाल सा-सानजा नि गोख्रों उदखारि हान्जा नागा ससियेलिस्ट टाउनसिल सुंद'यै NSCN IM नि गोजौ थाखोनि दैदेनगिरि इसाक मैभाया नागानि आलादा फिरफिला आरो संबिजित बाहिर खालामनायनि आयदायाव आसामनि गिबि मन्थ्रि सर्बानन्द सन'वाल गावसोरनि थिरांथा रोखा खालामनो राइजोनि बारग' गिबि मन्थ्रि तरुन गगैया खौरांमेलनि गेजेरजों गोख्रों दाबि दैखांदों। हादोर जों लोगोसे राज्योनि खुंथाइ गोहोआव थानाय भारतीय जनता पार्ति नि दैदेननायाव सामलायनाय सोरखारा दा बावैसो सिगां नागा नोगोरारिनि थाखाय आलादा संबिजिदखौ फोसावनायनि बेलायाव मा फिन्नाइ होगोन। जेराव बिसोरनि मान सावगारियाव आसामनि गुवार हा खोन्दोयाबो सोफाजादों। बे गोनांथार आयदानि सायाव मिरु आरो राज्यो सोरखारा मा आगान लागोन होन्ना सोंखारियो।
बारग' गिबि मन्थ्रि तरुन गगैया आरोबाव बुंथिबावो दि असम गन परिसदनि गागि दैदेनगिरि आरो आगुनि गिबि मन्थ्रि प्रफुल्ल महन्तनि दैदेनाय ए जि पि सोरखारनि समाव उदखारिनि हाथियार दोन्थ'नानै सावरायनाय (Ceasefire Agreement) गोरोबथाखौ एक्सटेनसन खालामदोंमोन। नाथाय कंग्रेस अदेबानि आंनि खुंथाइनि आमोलाव बेखौ बेरेखा खालाम जादोंमोन। दासिमावबो बे आयदानि सायाव आसाम आरो नागालेण्ड गंनैबो राज्योनि गेजेराव मोनसे केस जौसिन बिजिरसालियाव दिन्दां जाना दं। बेखौ आसामाव कंग्रेसनि खुंथाइ गोहो थानाय समावनो गोख्रैथिजों मावफुं महर होनाय जादोंमोन।
नोगोरारि सोदांनाय फारिलाइ (CAB) नि सायाव बुंथियो बि जे पि दोलोआ आरोबाव फिन केब बिल लाबोनो नाजादों। बे बिलआ आइननि महर बबेखानि संसदाव बिल पास जायोब्ला आसामनि थागिबि नोगोरारि नि थाखाय गिलु - बालु जाखागोन। नाथाय दायो समावनो दुलाराय आसाम फरायसा आफाद (आसु) , असम थुनलाइ आफाद आरो कृषक मुक्ति संग्राम (के एम एस एस) या सिरि थानानै बिलनि हेंथायै जेबो सोमावसाराखै। बेनि सायाव सोरखारजों बुजिलाय नाय जादों होन्ना आफादफोरखौ गाज्रियै सोंखारियो। जोबथायाव फैगो बिसायख'थियाव ओनसोलारि राजखान्थि गोहो ए आइ इउ डि एफ जों एलायेन्स जानानै बिसायख'थियाव बाहागो लागोन नामा होननानै सोंनायाव बयनिबो थाखाय जोंनि लामाया उदां (Free) दं होन्ना बुंथियो।
