राज्यो सोरखारनि जन'ता भवन आरो आसाम आयेनसालिनि नेहाथारिख' लांगोनानि (Assam Legislative Assembly Premises) सिंङारि गोनांथार जायगा (Vital Location) फोराव मिजिंथियै जाथायखौ होबथानायनि थांखियै गं 350 निबो सि सि टि भि केमेरा फसंनाय जागोन।
रायखांनो गोनां दि 2007 माइथायाव आसाम नेहाथारिख' (दानि जन'ता भवन) आव फसंजानाय गोबां सि सि टि भि केमेरा या खामानि गैयिनि जाउनाव हादोरसा सोरखारनि न'खर आरो राजखान्थि बिफान (Home and Political Department) आरो सादारन खुंथाइ बिफान (General Administration Department) आ बे थिरांथाखौ आखायाव लाजेनो। दानि थाफानाय खामानि गैयि (Non Functional) केमेरा फोरखौ इं 2007 माइथायाव गुवाहाटी नोगोरमायाव खुंफुं जानांनाय 33 थि हादोरनां खेला (33rd National Games) फसंनाय जादोंमोन।
मख'जाथावदि हादोरसा सोरखारनि न'खर आरो राजखान्थि बिफान आरो सादारन खुंथाइ बिफान दा बावैसो सिगां जन'ता भवनाव मोनसे नायबिजिरनाय सामलायनायावनो खामानि गैयि सि सि टि भि केमेरा नि खौरांआ सोरांआव फैयो। गासै आबहावाखौ नायहैलायनायनि उनाव मोननै बिफाना (Department) राज्यो सोरखारनि जन'ता भवन आरो आसाम आयेनसालिनि नेहाथारिख' लांगोनानि (Assam Legislative Assembly Premises) सिङाव गोदान गोजौ थाखोनि सि सि टि भि केमेरा फसंनाय जागोन।
मख'जाथावदि बे मावथांखिखौ एमट्रन (AMTRON) मुंनि फसंथाना नडेल एजेनसि महरै खामानि मावलांनो आखायाव लादों। बेनि थाखाय मोनसे सिगां सारिनि फसंथाना (Reputed Organisation) गं 350 गोजौ महरनि सि सि टि भि केमेरा फसंलांनो थिखा टेन्डारनि खामानि आखायाव लादोंमोन। बेनि सिङाव 2.5 कौटि रां खर्साजों गोजौ थाखोनि मनिटरिं रुम लुफुंनाय जागोन। दासिमाव पि डब्लिउ डि बिफाननि मोब्लियारि खोन्दोआ डि पि आर थाम थिम खालामदों।
सादारन खुंथाइ बिफान (General Administration Department) नि नेहाथारि कमिसोनार (Secretary and Commissioner) ड° एम एंगामुथु बिथाङा दि सेन्टिनेल खौरांलाइजों जानाय मुगा मुगि बुब्लियाव बुंङो दि जन'ता भवन (Janata Bhawan)आरो आसाम आयेनसालिनि नेहाथारिख' लांगोनानि (Assam Legislative Assembly Premises) सिंङारि गोनांथार जायगा (Vital Location) फोराव सि सि टि भि केमेरा फसंलांनाया आंनि बिफाननि गुदि बिबान। बोहैथि बोसोरनि नबेम्बर दाननि गेजेराव बे मावथांखि मावनो लागोन होन्ना फोरमायहरो।
