Lakhimpur : आसाम सोरखारा गुबुन गुबुन जिलानि फरायसालियाव संनाय खावनाय खामानियाव नांथाबना थानाय आयजो ओंखाम संगिरिनि खामानिखौ एन जि अ खौ गथायनायनि हेंथायै गोख्रों सुबुंदारारि सोमावसारनायखौ नुनो मोननाय जादों।
मख'जाथावदि हादोरसानि दाब दाब जायगायाव खुंनाय बादि खर'सा आसामनि लक्षिमपुर जिलानि सिङाव थानाय गुबुन गुबुन गुदि फरायसालिनि सानजौफुनि आदार संग्रा खावग्रा खामानि मावबोनाय आयजो संगिरि फोरा हेंथा खालामनानै इउनियन आफादनि हांख्राइनायाव बि जे पि सोरखारनि हेंथायै खुद्रिसारनायa दिन्थिफुंङो।
15 बोसोर गुदि फरायसालियाव सानजौफुनि आदार संनाय खावनाय हाबायाव नांथाबना थानानै खामानि मावबोनाय आयजो फोरखौ हादोरसानि बि जे पि सोरखारा फरायसालिनिफ्राय हरखाबै बोखांनो नाजानायनि हेंथायै जिलानि गाहाइ जायगानि लांगोनायाव गोख्रों सोमावसारनाय हाबाफारि दिन्थिफुंङो। उनाव सोमावसारारि आयजो फोरखौ लक्षिमपुर जिला पुलिसनि बान्जायनायाव गोख्रों रैखाथि हान्जाया ज' जानानै सोमावसारगिरि आयजो फोरखौ होबथाहोयो। मोननैबो हान्जानि गेजेराव सौदावलायनायनि उनाव हमनानै लांनाय जायो।
बेरा फारसेथिं जाय गाव गोसो गौथुम (Non Governmental Organisation) खौ सानजौफुनि आदार संग्रा आरो राननाय हाबाफारि जागायजेन्नायनि गिबि सानावनो हादोरसानि दाब दाब जायगानि बादि लक्षिमपुर जिलानि गुबुन गुबुन फरायसालियाव बो एखे जाथाय सोमजियो जेराव गोबां बेले बेजे , देहा सावस्रिनि फारसे खहा खालामथाव जाग्रा , बाङाइ बिबांनि आदार रान्नाय नि गोख्रों अ'जद सिखारदों।
मख'जाथावदि बे जाथायखौ लानानै लक्षिमपुर जिलायाव गोख्रों फिनजाथाय सोमजिदों। लक्षिमपुर जिला निबनुवा सन्थाया हादोरसा सोरखारखौ गोख्रों सोंखारिनानै बुंथियो बिसोरो गिबि सानावनो ओंखाम रान्नायाव गाज्रि आखुनि बाहायबाय। जिल्ला मावख' खुंथाइनि लांगोनानिफ्राय एसे गोजाननि राधालिला आरो चेटिया गाव गुदि फरायसालियाव ओंखाम संनाय खावनाय खामानियाव नांथाबना थानाय आयजो फोरखौ होबथानानै एन जि अ सोद्रोमामोना जाग्रा आदार रान्नो हानाय नङा, फैयोब्ला दुंहाव थासारिजों मुगा मुगि नुजागोन होन्ना हुमखि होयो।
खौरां बिजोंनि गेजेरजों फोरमाय हरनाय बादिब्ला लक्षिमपुर जिला निबनुवा सन्थानि आफादगिरि बिनद दास , लेङाइ आफादगिरि राजु दास, तेलाहि इउनिटनि नेहाथारि स्रिमन्त बनिया मोना माधाराम गुदि फरायसालियाव नायगिदिंनानै बाङाइ गुननि जाग्रा नायनानै बुङो दि गिबि मन्थ्रि सर्बानन्द सन'वाल बिथांखौ बेबादि आयदानि सायाव गोनांथार राहा लानो खावलायो।
रायखांनो गोनां दि गोख्रों सोमावसारनाय हाबाफारिनि गेजेरजों सानजौफुनि ओंखाम संनाय खावनाय आयजोफोरा आसाम सोरखारनि खाथियाव दाबि दैखाङो जुदिसो सोरखारा जोंनि दैखांजानाय दाबिखौ गोसो गोर्बोजों सान्नानै लायाब्ला गोख्रों निफ्राय गोख्रों सिन सुबुंदारारि खान्थिजों सोमावसारगोन होन्ना हुमखि होयो।
