मोनद' हारिसाखौ एस टि मानदान्दानि सायाव मिरुखौ आसाम सोरखारा फैगो जानुवारीयाव फोरमायबिदां गथायगोन

Guwahati : आसाम सोरखारा गोलाव बोसोरनिफ्राय दाबि खालामफैनाय मोन 6 हारि हारिसानि गांनाय उखैनायखौ नोजोर लाखिनानै मन्थ्रि हान्जा (Group Of Minister) या गुवारै सावरायज्लायनायनि गेजेरजों एस टि मानदान्दानि थाखाय फैगो गोदान बोसोर 2020 नि जानुवारि दानाव मिरु सोरखारनिसिम आर'जलाइ (Recommendation) गथायगोन। बेजों लोगोसे हादोरसानि सिङाव थानाय मोनब्रै हारिसा फारियै मरान,मटक, आहम आरो चुटियानि सिनायथि , रैखाथि आरो हारिनि बायखोन्दा नेरसोनखौ बुरखांनाय, जौगाखांनायनि थाखाय गासै 125 कौटि रां (Crore) अन्सुंथाइ महरै होनाय जागोन होन्ना खौरां मेलनि गेजेरजों मिथिहोदों।

बेराफारसे थिं जाय आसामनि थागिबि कच राजबंची सुबुं माहारि (Community) नि जौगाखांनायनि थाखाय बोखावजायै गवालपारा जिलाखौ लाफानानै गावखुंथाइ गौथुम (Autonomous Council) सोरजिनायनि थिरांथा लादों हादोरसा सोरखारा। लोगोसे मरान , मटक सुबुं माहारिनि जौगाखांनाय बिथिंखौ नोजोर लाखिनानै आलादा गावखुंथाइ गौथुम दाफुंनायनि फार्से आवगायलांनायखौ मोनथिनो मोननाय जादों। थागिबि मरान सुबुं माहारिनि थाखाय देहा फाहामसालिमा (Medical College) याव एखुथा उफ्रा मासि लाखिनायनि खोथा मख'लांङो। राधब मरान जिउ जारिमिन सायाव नुथाइ सावगारि (Documentary) बानायनोबो नांगौथार बिबांनि रां अन्सुंथाइ महरै होनाय जागोन होनना फोरमायदों।

रायखांनो गोनां दि मैया अदेबानि बृहस्पतिबार खालि जनता भबनाव थानाय गावनि मावख' खथा (Conference Hall) याव जानाय मोनसे सावराय जथुमाव गिबि मन्थ्रि (Chief Minister) सर्बानन्द सन'वाल बिथांआ मोनद' थान्दै हान्जा Six Communities Delegates) नि नुजाथिनायाव बे सदबांसाखौ होयो।

गुबुन फारसेथिं जाय गिबि मन्थ्रि सर्बानन्द सन'वाल बिथांजों दुलाराय आसाम चुटिया आफादनि दैदेनगिरि मोनजों जानाय मोनसे सावराय जथुमाव सति साधनी दिबसखौ सोरखारि बन्द' फारिलायाव सरजाबनाय जासिगोन। गोबां बोसोरनिफ्राय आलो गोजोनै जिउ खांनाय चुटिया माहारिनि राव सिनायथि, हारिमु जौगाखांनायजों लाइमोन गोहोखौ थुलुंगाखांनाय आरो गासैबो बिथिङाव समनि फाखनाव आवगायलांनो हानाय बादि हादोरसानि सोरखारनि नांथाब नाजानायाव 125 कौटि रां अन्सुंथाइ महरै फोसावनायनि खोथा फोरमायो। चुटिया सुबुं माहारि गोगोम थानाय जायगाफोरखौ जौगाखांनाय आरो नेरसोनफोरखौ बुरखांनायनि थाखाय सति साधनी मुङै सोलोंथाइ फसंथान गायसननाय जासिगोन।

मख'जाथावदि गिबि मन्थ्रि सर्बानन्द सन'वाल बिथांआ मोननैबो सावराय जथुमाव आसामनि सिङाव थानाय थागिबि सुबुं माहारिनि गासैबो बिथिङाव जौगाखांनायनि थाखाय सोलायथाइ मोन्थोर सिगांआव लाबोनानै खुंथाइनि गोहोआव जिरायनाय भारतीय जनता पार्ति सुंद'यै बि जे पि नि दैदेननाय राज्यो सोरखारा खामानि मावलांगासिनो दं। सुबुं समाजनि राव , हारिमु, सिनायथि , रांखान्थियारि, राजखान्थियारि,समाजारि गासैबो बिथिङाव रैखाथि थामोनथा होनायाव जोंनि गुदि बिबान दं होन्ना फोरमायो।

मख'जाथावदि गिबि मन्थ्रि सर्बानन्द सन'वाल बिथांजों जानाय सावराय जथुमाव एम एल ए बलीन चेटिया,रनज पेगु,बिमल बरा, WPT & BC नि कमिसोनार नेहाथारि ड° एम आंगामुथु, गिबि मन्थ्रि नि नेहाथारि रन्जन चक्रबर्ती बिथांआबो नुजाथिफैयो।

Also Read : अस’मियाखौ हादोरसायारि राव महरै गायसंलांनो बि जे पि नि एम एल ए मोना गिबि मन्थ्रिखौ नारसिनदों

Also Watch: AASU Rally Against CAA 2019 in Kokrajhar