Mangaldai: बर' थुनलाइ आफादनि फैगो बोसोराव जानो गोनां बोसोरारि जथुम्मा (Annual Session) खौ लानानै लाहार फाहार खालामनाय नुनो मोननाय जादों। बे थांखियै मैया अदेबानि बुधबार खालि उदालगुरि जिलानि सिङाव थानाय खैराबारिनि खाथिसिननि जारिमिनारि तिम्रेश्वरी मन्दिरनि माजर चुबा गामिनि फैलाव माय फोथाराव सानथामनि रंगिना संगिना हाबाफारिनि थाखाय मिरु बर' थुनलाइ आफाद (Boro Sahitya Sabha) नि बिबानगिरिजों लोगोसे 2000 निबो गोबां गामियारि राज्यो-राजा ज' जाफैनायाव गाहाइ खुन्थिया गायसननाय जायो। जेराव बर' थुनलाइ आफादनि खुंगा 59 थि बोसोरारि जथुम्मानि बै हाबाफारियाव बि एस एस नि अफिस बियेरारफोरजों लोगोसे गुबुन गुबुन आफादनिबो मावथि सोद्रोमा मोना बाहागो लाफैयो।
आसामनि दावबाय बिफाननि मन्थ्रि चन्दन ब्रह्म बिथांआ बर' थुनलाइ आफादनि आफादगिरि (President) तरेन बर', नेहाथारि (Secretary) प्रसान्ट बर' आरो आसाम प्रदेश भारतीय जनता पार्ति नि आफादगिरि (Assam BJP President) आरो सर'भगनि एम एल ए (Legislator) रन्जित कुमार दास बिथांनि नुजाथिनायाव थांखि जानाय खुंगा 59 थि बर' थुनलाइ आफादनि बोसोरारि जथुम्मानि सायनासालि नि गाहाइ खुन्थियाखौ गायसनलांङो। बै हाबाफारियाव बाहागो लानानै मन्थ्रि ब्रह्म बिथांआ बुङो दि दासिमाव गिबि मन्थ्रि सर्बानन्द सन'वाल बिथांआ दैदेननाय हादोरसा सोरखारा राज्योनि सिङाव थानाय गुबुन गुबुन माहारियारि आफाद गौथुमनि राव थुनलाइ हारिमुखौ जौगाखांनायनि थाखाय जर'खा बिफाव महरै 25 लाख रां मोनफ्रोमबो बोसोराव सेंसन खालामनाय जादों। बे सारिनि गेजेराव बर' थुनलाइ आफाद (Boro Sahitya Sabha) आबो दं। लोगोसे मन्थ्रि (Minister) बिथाङा बर' रावखौ जौगाखांनाय , फेहेरनाय आरो गेवलांसारनायनि थाखाय समजों गोरोबलांनानै डिजिटेल राहा (Digital Mode) नि मदद लानाय जादों।
बर' थुनलाइ आफादनि बान्जाय आफादनि मासिगिरि लोमस्राव दैमारिया मासि सामलायनाय हाबाफारियाव बर' हारिनि दिथागिरि गौथुम बर' थुनलाइ आफादनि आफादगिरि तरेन बर' बिथाङा बुङो दि बे जथुम्माया बर' माहारिनि जेंना जेंगोनाखौ सुस्रांलांनायाव बयबो गावखौनो गाव सांग्रांथि आरो खौसेथि लामानि नोजोरजों मदद खालाम फैगोन। बेरा फारसेथिं जाय आसाम प्रदेश भारतीय जनता पार्ति नि आफादगिरि रन्जित कुमार दास बिथाङा माननि आलासि महरै बाहागो लानानै बुंथियो दि साफ्रोमबो बर' फिसाया बोसोरारि जथुम्माखौ दाजाबथाइ गोसो गोर्बोजों हारिनि इयुन जौगाखांनाय मोन्थोर लानानै मदद होनांगोन। जाहाथे बे रंगिना संगिना हाबाफारिजों खुफुंजानो गोनां जथुम्माया गाहामै गाहाम जाफुंसार जायो। लोगोसे बेवहायनो दास बिथाङा गावनि रां दानबान्थाखौ आफादनिसिम दान हरनायखौ फोसावो।
मख'जाथावदि फैगो गोदान बोसोरनि जानुवारी 20, 21 आरो 22 आव बि पि एफ नि एम एल ए चरन बर' बिथाङा से लाख रां बान्जाय आफादनिसिम दान महरै हरनायखौ फोसावो। बै हाबाफारियाव एबसु, एन डि एफ बि (प्र), इ एम जगदीश सरकार, एम एल ए महेश्वर बर', कमली बसुमतारी, नेरसोन बर' जों गोबां गुन गोनां सुबुंआ बाहागो लाफैयो।
