Kokrajhar: गोलाव द' बोसोरनिबो बारा सम सोमावसारनाय, जारिमिनारि खारिथि आरो गुबुन गुबुन आयदानि सायाव मोनसे सावथुन बिहोमा होलांनो थाग थियारि जादों। मख'जाथावदि बर' डकुमेन्ट्रि "दि बर'- फाइड फर आइडेन्टिटि" मुंनि सावथुनखौ आसाम गुवाहाटीनि फिसाजो अनामिका बसुमतारी आरो मुम्बाइनि निसान्त बालगबिन्दनि नाजानायाव सावथुनखौ दा बावैसो साननि गेजेरावनो दिन्थिनाय जासिगोन।
मैया अदेबानि बृहस्पतिबार खालि कक्राझार प्रेस क्लाबाव सावथुननि महरगिरि हान्जा (Film Artists Team) या मोनसे सावराय जथुम खुंफुंङो। खौरांगिरिजों जानाय मुगा मुगि बुब्लियाव सावथुननि बिथोनगिरि (Director) आरो लिरगिरि (Script Writer) अनामिका बसुमतारी बिथाङा फोरमायना बुङो बे सावथुनखौ बानायनो थाखाय गोलाव 6.5 बोसोर सम गुवारै बिजिरसंनाय (Research) जादोंमोन। जेराव गुबुन गुबुन बिजाब बाख्रि (Library) , डकुमेन्ट, रेकर्ड,आर्काइभ,खौरांलाइ (Newspaper) आरो इन्टारभिउनि मदद लाग्रोनाय जादोंमोन।
मख'जाथावदि थागिबि बर' हारिनि राव हारिमु दोहोरोम समाजखान्थि आरो जारिमिनारि सोमावसारनायनि सायाव सावथुनखौ थाम थिम खालामनाय जादों। जेराव बर' हारिनि रांखान्थियारि, राजखान्थियारि थामोन्था आरो मोनथायखौ जारिमिनारि रैखाथि होनाय थांखिया बेरखांदों। लोगोसे जारिमिनारि समनि आगोल (Pre Historic) निफ्राय दासिमनि राजखान्थियारि सावगारि (Present Political Scenario) खौ बिथा खालामनानै महर होनाय जादों।
1847 माइथायाव ब्रिटिस हादोरमानि नोगोरारि पाअ'निर नेसारिलिष्ट आरो इथन'लजिष्ट बि इद्स हडसना भारत हादोराव हाबफैनानै गावनि लिरनाय बिजाबाव फोरमाय हरदोंमोन दि बर', कच आरो डिमासा माहारिखौ बर'नि सोलायै सिगांनि समाव बड' होन्ना गाबज्रिदोंमोन। गाहायै बर' हारिनि सुबुंखौ सिनायलायनो थाखाय बड' होन्ना मिथिनाय जादोंमोन। मख'जाथावदि सा-सानजा हादोरसानि दाब दाब जायगायाव गोसारजानानै थानाय बर' ट्राइबेल माहारिनि राव (Language), जानाय लोंनाय हुदा (Food Habits), गान्नाय जोमनाय (Dressing Sense), दोहोरोम (Religion) , दोरोङारि नेम खान्थि (Traditional Custom) बायदिया आबुंङै आलादा महरनि।
लोगोसे बिथोनगिरि अनामिका बसुमतारी बिथाङा बुङो दि बर' गोगोम हालामाव गोबां गुबुन गुबुन सुबुं हान्जाया हाबफैनानै आयेन बेरेखायै हा आवथेबाय एबा गावनि आवथायाव लाखांबाय। जायनि थाखाय दिनै बर' समाजा गावनि राव, थुनलाइ, हारिमु दोहोरोमनि थामोन्था (Existence) आरो रैखाथि होनायाव समखिखांनाय फैदों। गावनि सिनायथियाव अल'खद नुजाफैदों। जायखि जादोला मानो बर' हारिनि साफ्रोमबो सुबुंआ बेबादि दुखुनांथाव हालोदखौ गोसो गोर्बोजों मोनदांनाइ फैयाब्ला समाजारि (Social), रांखान्थियारि (Economically), राजखान्थियारि (Politically) आरो सोलोंथायारि (Educationally) बिथिङाव गावखौनो-गाव फोजौखांनो हानाय नङा। बेबादि जिंगासिनांगौ बाथ्रायाव बर' फिसाया खौसेथिनि दौलेंजों सांग्रांथि लाबोनो हायाब्ला समनि फाखनाव गावस्रांनाय लाबोगोन होन्ना फोरमायो।
मख'जाथावदि आसामनि फिसाजो अनामिका बसुमतारी बिथाङा गोदान दिल्लीआव थानाय नयदानि एसियान एकादेमीनि सोलोंथाइ लानाय टेलिभिसन आरो फ्लिम प्रडाकसननि डिप्लमा आवथेगिरि। सावथुन मुलुगाव आगान होनायनि सिगां बिथां बसुमतारिया गुबुन गुबुन बिथिङाव खौरांगिरि आरो डाइरेक्टर महरै खामानि मावलांदोंमोन।
